Hatutan.com (14 Fevereiru 2022) Dili-Tribunál Rekursu (TR), Segunda (14/02/2022), publika ona lista admitidu kandidatu Prezidente Repúblika (PR) periodu 2022-2027 na’in-16 no ba Kandidatu Luis Tilman nian, TR notifika fó tempu oras 24 nia laran atu kompleta tan dokumentu.

Notísia iha Relasaun: TR Verifika Hela Dokumentu Kandidatu Prezidente Repúblika Na’in-17

Prezidente Tribunal Rekursu, Deolindo dos Santos. Foto/Dok.Espesál

Kandidatu PR sira ne’ebé TR notifika admitidu mak hanesan kandidatu husi partidu CNRT, José Manuel Ramos-Horta,  Armanda Berta dos Santos (KHUNTO),  Francisco Guterres “Lú Olo (Partidu FRETILIN),  Mariano Asanami Sabino (PD), Partidu Demokrátiku da Repúblika de Timor (PDRT) Anacleto Bento Ferreira.

Kandidatu independente ne’ebé admitidu kompostu hosi Felisberto Araújo Duarte, Milena Pires, Angela Freitas, Isabel Fereira, Hermes da Rosa Correia Barros, Lere Anan Timur, Rogério Tiago Lobato, Virgílio da Silva Guterres “Lamukan”, Constâncio da Conceição Pinto, Antero Benedito da Silva no Martinho Germano Gusmão.

Ba Kandidatu Luis Tilman la admitidu momentu ne’e no fó tempu oras 24 nia laran, hahú husi ohin, tuku 15:00 Otl, to’o fali Tersa aban (15/02/2022), tuku 15:00 Otl, atu kompleta dokumentu sira, hanesan númeru proponente,  dokumentu auténtiku no kartaun eleitorál proponente sira husi Munisípiu tolu; Liquiça, Viqueque ho Manufahi.

“Maske iha irregularidade ne’ebé kandidatu sira komete, maibé konsege kompleta dokumentu, maibé iha kandidatu na’in-ida maka la prienxe rekijitu ne’ebé iha maka Luis Alves Tilman, maske aprezenta proponente liu 5,000 maibé nia la prienxe rekijitu ne’ebé lei hateten katak kada munisípiu mínimu proponente ema rihun ida, tanba ne’e iha munisípiu tolu maka nia la konsege kompleta númeru proponente maka husi Manufahi, Viqueque no Liquiça,” Prezidente Tribunál Rekursu, Deolindo dos Santos, informa ba Jornalista sira, bainhira anúnsiu rezultadu kandidatura admitidu iha TR, Caicoli, Segunda (14/02/2022).

Ba kandidatu Luis Alves Tilman, TR sei fó prazu loron ida nia laran hodi rekorre no kompleta nia dokumentu ne’ebé sei termina iha loron aban, 15 fulan-Fevereiru ne’e, iha tuku 15:00, maibé bainhira nia la rekorre maka desizaun ne’e definitive ona no bainhira rekorre maka TR liu husi juiz koletivu sei haree fali desizaun ne’e iha prazu loron rua nia laran hodi foti desizaun.

Munisipiu Atauro sei nafatin entrega iha Munisípiu Dili mezmu ke kandidatu balun aprezenta mós lista proponente rihun ida husi Atauro, maibé TR konsidera hanesan proponente husi Munisípiu Dili nian.

Kandidatu Luis Alves Tilman ne’ebé Hatutan.com konfirma via telefónika haktuir katak, nia simu ona notifikasaun husi TR no sei kompleta hikas dokumentu iha Tersa aban (15/02/2022).

“Agora ha’u prepara ona dokumentu hodi kompleta hikas iha loron aban molok tuku 15:00, no sei lori hikas dokumentu ba Tribunal Rekursu liu-liu lista proponente ne’ebé sei menus husi atus ida iha Munisípiu Liquiça, Viqeuque ho Manufahi. Maibé, bainhira la konsege maka ami sei submete ba desizaun TR nian,” Luis Tilman hateten.

Iha prazu loron rua nia laran ba TR liu husi juiz koletivu hodi deside hikas desizaun ba kandidatura Luis Alves Tilman admitidu ka lae, hafoin ne’e maka TR sei hasai lista definitivu hodi hakat ba dada númeru sorteiu kandidatu sira-nian ne’ebé sei hala’o iha TR.

Jornalista: Carmelita Isaac