Hatutan.com, (21 Fevereiru 2022), Díli- Foin-sa’e nudár ai-riin ba nasaun, nune’e iha obrigasaun moral atu konsolida unidade nasionál hodi rekonstrui no defende país nudár devér mútua. Maske nune’e, Estadu iha devér tuir kbiit tomak ne’ebé iha atu apoiu no promove foin-sa’e sira liu husi edukasaun, formasaun no kultura.

Programa eduka sívika ba juventude iha salaun Laline-Larigutu, CNE, Dili, Segunda (21/02/2022). Foto/Hatutan.com

Komisaun Nasionál Juventude Timor-Leste (CNJTL, sigla portugés) nudár organizasaun juventude ne’ebé hamriik independentemente no sai nudár mahon ba kamada juventude tomak ho papél importante atu assume responsabilidade ba enkoraja no motiva kamada juventude hotu atu hola parte ativu no kriativu, kritiku iha parte demokratizasaun ne’e ho di’ak, maduru no síviku.

Prezidente CNJTL, Dadi Magno iha nia diskursu abertura ba programa eduka sívika ba juventude iha salaun Laline-Larigutu, CNE, Dili, Segunda (21/02/2022) hateten, atividade  edukasaun sivika ida-ne’e realiza ho objetivu prinsipál atu hamoris foin-sa’e sira-nia vizaun ba Estadu hodi hadomi Timor ho fuan, hanoin no doutrina iha sentidu nasionalizmu liu husi hatene valores ukun rasik an no orgullu nudár timoroan.

“Iha palku demokratizasaun sempre iha dinámika, importante mak ita hotu uza ita-nia votu ho responsabilidade,” Dadi Magno hateten.

Prezidente CNJTL, Dadi Magno. Foto/Hatutan.com

Papél juventude nian, tuir nia, tenke fó votu ho responsabilidade atu hili lideransa ne’ebé bele konsolida unidade, asaun no progresu ba povu tomak nia moris di’ak. Tanba ne’e, foin-sa’e hotu nia votu mak determina nasaun nia futuru.

Iha parte seluk prezidente CNE, José Agostino Belo hateten juventude sira otas nurak iha responsabilidade rasik ba nia desizaun. Ohin loron, kandidatu prezidensiál sira ne’ebé konkorre iha eleisaun, tinan ne’e, mai husi sira nia investimentu tinan 40 liubá. Tamba ne’e, foin-sa’e sira ohin loron tenke iha vizaun rasik atu investe hahú agora, atua ban bainrua bele hamriik mesak harii nasaun ne’e.

“Juventude esperansa ema hotu nian tamba joven mak futuru nasaun nian, maibé dala ruma juventude hatudu hahalok diferente hodi kontribui ba instabilidade,” José Agostino Belo hateten.

Tamba ne’e hanesan juventude millennial tenke halo di’ak liu joven sira uluk hodi kontribui ba dezenvolvimentu país nian tamba imi nia votu mak termina nasaun nia destinu.

Estudante UNTL Fakuldade Edukasaun, Departamentu Lian Tetum, Joanico da Costa hateten oportunidade ba foin-sa’e sira atu aprende no buka hatene hodi hasa’e koñesimentu atu iha vizaun rasik uainhira hili lideransa nasaun nian.

“Ha’u sente programa edukasaun sívika ne’e atu aumenta ami nia koñesimentu, tamba ne’e, bainhira eskola hili ha’u mai tuir ha’u prontu,” Joanico da Costa hateten.

Programa Edukasaun sívika ba juventude sira-ne’e realiza tamba servisu hamutuk entre Komisaun Nasional Eleisaun (CNE), CNJTL, Sekretariadu Tekniku Administrasaun Eleitorál (STAE), Polísia Nasional Timor Leste (PNTL), Komisaun Reguladóra Arte-Marsiál (KRAM) no Komisaun Anti Korrupsaun (CAC) ho tema “Hakbiit Juventude sira nia Sentidu de Pertense ba Aktu Eleitorál iha Ámbitu Eleisaun Prezidente RDTL 2022”

Jornalista: Vito Salvador