Hatutan.com, (19 Marsu 2022), Díli-Kandidatu Prezidente Repúblika 2022-2027, José Manuel Ramos-Horta, ezerse ona nia direitu votu iha Estasaun  Votasaun Suku Meti-Aut, Dili, Sábadu (19/03/2022).

Kandidatu PR 2022-2027, José Manuel Ramos-Horta vota iha Estasaun Votu iha Sede Suku Meti-Aut, Dili, Sábadu (19/03/2022). Foto/Hatutan.com

José Ramos-Horta to’o iha fatin votasaun ho nia karreta antigu ida no liu kedas ba fatin vota nian hodi kumpre devér síviku atu hili Prezidente Repúblika ida ba períodu 2022-2027. Nudár kandidatu ida husi sira na’in-15, José Ramos-Horta, deklara prontu simu desizaun husi povu mezmu la favorese ba nia an rasik.

“Ita hotu hein rezulta no rezultadu saida de’it mak iha, ha’u hakruk tanba ne’e povu nia desizaun,” José Ramos-Horta hateten.

Ramos-Horta hateten, povu sei fó votu tuir sira-nia konfiansa no esperansa rasik tuir sira-nia vontade atu bele muda situasaun balun ho prezidente ida ideal liu tuir sira-nia preferénsia atu kaer knaar ho di’ak no dezenvolve ekonomia nasaun nian.

“Ha’u otimista sei konkista vitória, mais demokrasia iha eleisaun oin-seluk, opiniaun publika hateten buat ida  tamba ne’e ita tenke preparadu ba buat sira ne’e,”  Ramos-Horta tenik.

Premiadu Nobel ba Pás nian ne’e  promete karik manan iha eleisaun prezidensiál ne’e sei hamutuk ho forsa polítika sira ne’ebé apoiu nia ho maioria iha parlamentu eleje meza foun no rezolve krize ne’ebé akontese iha parlamentu.

“Atu forma ho dalan disolve parlamentu no hakat ba eleisaun antesipada ka ho konsensu iha parlamentu tamba maioria foun hodi forma Governu foun,” nia subliña.

Horta mós agradese ba komunidade internasional ne’ebé apoiu Timor-Leste iha prosesu eleitorál ida ne’e liu husi observadór internasionál sira husi nasaun CPLP no Uniaun Europeia.

Iha suku Meti-Aut iha sentru votasaun rua, ida mak E.P. Filial Meti-Aut no estasaun Votasaun Sede Suku Meti-Aut ho total votante hamutuk 1,309.

Jornalista: Vito Salvador