Hatutan.com, (22 Marsu 2022), Díli- Sekretáriu Estadu ba asuntu Kombatente no Libertasaun Nasional (SEAKLN), Júlio da Conceição “Loro Mesak” ne’ebé troka Gil da Costa Monteiro “Oan Soru”, promete kontinua servisu halo verifikasaun ba dadus veteranu no rekolla restu mortál  eroi no martires da patria sira hodi tau iha fatin dignu.

Notísia iha Relasaun: Lú Olo Fiar Membru Governu Na’in-haat Sei Benefisia no Hadi’a Dezempeñu Governamentál

Loro Mesak asina termu posse iha PR Lú Olo nia oin nu’dár Sekretáriu Estadu ba asuntu Kombatente no Libertasaun Nasional (SEAKLN). Foto/Hatutan.com

Hafoin simu  tomada posse husi Prezidente Repúblika, Francisco Guterres “Lú Olo iha Palásiu Prezidensiál, Dili,  Júlio da Conceição “Loro Mesak”  ba jornalista sira hateten, mandatu ne’ebé nia simu badak tebes (2022-2023), maibé sei iha esforsu atu kontinua halo servisu sira ne’ebé sekretáriu estadu sestante halo ona no husik hela atu bele mellora di’ak liután no nafatin servisu hamutuk ho ministériu tutela atu kontinua verifika dadus veteranu sira 2009 ne’ebé to’o oras ne’e sei pendente no tau mós prioridade ba rekolla restu mortál sira hodi ba haloot iha jardín erois nasionál ho munisípiu sira.

“Iha fulan-Abríl ita sei kontinua verifika dadus veteranu sira ne’ebé rejista iha tinan 2009 tamba ida-ne’e ita nia prioridade atu halo hotu iha tempu badak,” Júlio da Conceição “Loro Mesak” hateten.

Verifikasaun baze dadus ba veteranu sira ne’ebé rejista iha tinan 2009 loloos remata ona tuir kalendáriu ne’ebé SEAKL iha, maibé tamba pandémia COVID-19 no kalamidade publika ne’ebé Timor Leste enfrenta halo servisu sira ministériu nian pendente, nune’e obrigadu tenke para durante tempu balun.

Loro Mesak hatutan, nudár veteranu knar ne’ebé nia simu husi xefe Governu no xefe Estadu la’ós priviléjiu ba nia ho família, maibé ne’e nudár responsabilidade boot ida ne’ebé tula iha nia kabas atu lori  hodi serbí nasaun no povu.

Notísia iha Relasaun: Remodelasaun Atu Halo Buat Barak no Di’ak Liu Tán

Jornalista: Vito Salvador