Hatutan.com (24 Marsu 2022), Díli—Tribunál Distritál Díli (TDD), liu hosi leitura sentensa ne’ebé lee hosi juiz kolektivu Alvaro Freitas, José Gonçalves, Argentino Nunes deside aplika pena multa $120, konklui ho taxa diária $0.50 ba arguidu Armando Soares no arguida Irma de Jesus ne’ebé kada ema sei selu multa ho valór $60 ba kofre Estadu ba krime kontra bandu tanba hatama minarai litru 2.160 illegalmente mai Timor Leste liu hosi Maubara.

Tribunal esplika razaun aplika pena multa ne’e, tanba konsidera faktus provadu bazeia ba konviksaun arguidu ho arguida katak arguidu na’in-rua pratika krime kontra bandu hodi hatama minarai ilegál hosi Atapupu mai TL la ho selu taxa ba Estadu.

Notisia iha Relasaun:Tranzasaun Ilegál Kontinua Akontese iha Fronteira Terrestre

Maibe Tribunal tetu sirkuntansias hotu katak arguidu ho arguida kolabora di’ak durante prosesu julgamentu.

Antes ne’e, tuir akuzasaun hosi MP ne’ebé aprezenta hosi Prokuradór Aderito Tilman katak, iha loron 09 fulan Jullu tinan 2019, tuku 24:00 otl kalan iha Maubara, arguidu no arguida kontaktu malu ho sidadaun iha Indonézia ne’ebé hela iha Atapupu, hodi hatama mina rai illegal iha área Loes.

Bainhira Roó para iha área Sabalau Maubara Polisia ne’ebé halo patrullamentu iha área ne’eba halo kedan apreensaun ba arguidu  ho arguida ho evidénsia hanesan Minarai masa 5 litru hamtuk 84 no masa 20 litru hamutuk 60.

Totál hosi minarai hirak ne’ebé arguidu Armando Soares sosa maka litru 960 no hosi arguida Irma de Jesus maka litru 1200.

Tanba ne’e, Ministeriu Públiku akuza arguidu no arguida ba pratika krime kontra bandu ne’ebé previstu iha artigu 316 hosi kódigu penál TL, tanba hatama minarai illegal no la selu taxa ba Estadu.

Julgamentu iha Kinta 24 fulan ne’e, arguidu no arguida hetan asisténsia legál hosi Defensór Públiku (DP) João Carvalho.

Jornalista: Carmelita Isaac