Hatutan.com (25 Marsu 2022) Díli—Governu liu hosi Ministériu Justisa (MJ) hamutuk ho Empreza ENSUL MECI, sei formaliza  akordu kontratu arrendamentu rai ba konstrusaun Díli Financial Business Center (DFBC), hodi garante investimentu iha Timor-Leste tuir lei bens e moveis.

Ministru Justisa, Tiago Amaral Sarmento ho Prezidente ENSUL MECI Alexandre Marques Couto. Foto/Repro.

Maski antes ne’e, Governu iha ona akordu kontratu ba investimentu maibé seidauk iha akordu  arrendamentu ba rai konstrusaun DFBC.

“Ohin hau halo reuniaun direta ho dirijente ENSUL MECI hodi regulariza estatutu rai ne’ebé daudaun sira halo hela konstrusaun. Tanba ne’e, Governu husu atu ENSUL MECI bele formaliza kontratu arrendamentu nune’e bele selu tanba rai ne’e Estadu nian no ema ki’ik sira selu fulan-fulan, bo’ot sira mós tenke selu fulan fulan,” Ministru Justisa, Tiago Amaral Sarmento hateten ba jornalista sira hafoin halo inspesaun ba konstrusaun DFBC iha Colmera, Sesta (25/03/22).

Durante ne’e, iha konstrusaun DFBC ENSUL MECI seidauk selu arrendamentu ba Estadu, tanba bazeia de’it ba akordu investimentu no laiha akordu arrendamentu.

Nune’e, kualkér investimentu ne’ebé iha tenke iha mós akordu arrendamentu ba rai ne’ebé uza ba investimentu hodi bele garantia ninia investimentu tuir lei bens e moveis.

Prezidente ENSUL MECI Alexandre Marques Couto aseita ho pedidu hosi MJ hodi formaliza kontratu arrendamentu, tanba rekoñese katak durante ne’e la selu arrendamentu ba rai ne’e.

“Ha’u husu MJ atu formaliza akordu arrendamentu ba investimentu ne’e no ami nia parte simu desizaun Governu nian, nune’e investimentu ne’e bele la’o ho di’ak,” Alexadre Marques Couto, hateten.

Konstrusaun edifísiu DFBC ho valor osan millaun $30 no obra atinji ona 60% ho andar 15.

Jornalista: Carmelita Isaac