Hatutan.com, (29 Marsu 2022), Díli– Ministériu Públiku ne’ebé reprezenta husi Prokuradór Matias Soares husu ba Tribunál Distritál Díli (TDD)  atu aplika pena prizaun efetivu tinan-tolu no suspende tina- tolu ba arguidu DCS ba krime abuzu konfiansa, falsifikasaun agravada no kontrafasaun ba selu, relasiona ho falsifikasaun karimbu no asinatura funsionáriu BNU hodi la kontribui taxa kontentór husi Kmanek Supermerkadu ba kofre Estadu.

Tribunál Distritál Díli (TDD). Foto/Hatutan.com

Liu husi alegasaun finál iha audiénsia julgamentu iha TDD, Tersa (29/03/2022),  MP husu pena efetivu, tanba faktu provadu katak arguidu nudár broker husi supermerkadu ida iha Dili ne’e simu osan husi pesoál finansa supermerkadu ne’e nian ho montante $26.305,00 ba arguidu hodi ba selu taxa kontentór nian iha BNU, maibé arguidu falsifika karimbu no asinatura funsionáriu BNU hodi utiliza osan refere ba interese privadu.

Advogada privada Adelina Lobo husu ba Tribunál atu aplika pena adekuadu ba arguidu tuir konviksaun, tanba antes julgamentu arguidu devolve ona osan ne’ebé nia uza.

Hafoin alegasaun juiz prezide marka hikas audiénsia ba loron seluk hodi rona desizaun.

Tuir akuzasaun husi MP katak arguidu servisu hanesan intermediáriu ka broker iha Portu Dili, dezde tinan 2012 ho servisu prinsipál mak trata dokumentu atividade emprezariál no hahú loron 24 fulan Dezembru tinan-2016, arguidu servisu nudár funsionariu ka broker ba empreza supermerkadu  balun iha Dili ho obrigasaun trata dokumentu liga kontentór ne’ebé tama iha portu Dili.

Arguidu sai ona broker ba empreza supermerkadu refere ho nune’e taxa kona-bá kontentór nian entrega hotu ba arguidu mak ba selu iha BNU inklui taxa demora (Demorate fee).

Iha loron-23, fulan-Marsu tinan-2018, hale’u tuku 11H00, funsionáriu balun iha APORTIL fó hatene ba investigadór husi Polísia Nasionál Servisu Investigasaun Kriminál (PNSIC, sigla portugés) katak iha indivíduu ida lori dokumentu falsu inklui karimbu husi BNU ba trata pagamentu iha APORTIL, tanba ne’e membru PNSIC dezloka ba APORTIL hodi konfirma kona-bá verasidade informasaun refere.

Bainhira membru PNSIC to’o iha Portu Dili, funsionáriu APORTIL aprezenta arguidu ba PNSIC inklui ho dokumentu no karimbu BNU ne’ebé mak arguidu falsifika, tanba ne’e PNSIC halo kedan detensaun ba arguidu no halo mós Apreensaun ba dokumentu ho Karimbu.

Konforme invoice husi APORTIL katak parte finansa supermerkadu ida iha Dili ne’e  entrega Osan ho kuantia $26.305,00 iha faze 24 hodi ba selu taxa kontentór iha BNU, maibé arguidu la ba selu hodi prepara de’it dokumentu no formuláriu pagamentu falsu husi BNU hodi falsifika karimbu BNU inklui asinatura funsionáriu BNU.

Ho dokumentu no karimbu falsu sira ne’e, arguidu apropria tiha osan ho montante $26, 305.00 ne’ebé tuir loloos tama ba konta Estadu nudár taxa ne’ebé mak Empreza Supermerkadu refere tenke selu, maibé iha loron 23 fulan-Marsu 2018, arguidu selu ona, tanba ne’e MP akuza arguidu ba pratika krime abuzu konfiansa, falsifikasaun agravada ho kontrafasaun ba selu, kuñu, marka ka xansela ne’ebé previstu iha artigu, 257, 304, 310 reforsa ho artigu 35 hosi Kódigu Penál TL.

Audiénsia julgamentu ne’e, prezide hosi juiz koletiva Ercilia de Jesus, Afonso Carmona, Evangelino Belo, MP reprezenta hosi Prokuradór Matias Soares no arguidu hetan asisténsia legál hosi Advogada Privada Adelina Lobo ho  Virna Carvalho.

Jornalista: Carmelita Isaac