Hatutan.com (11 Abríl 2022) Díli—Comisão Nacional das Eleicões (CNE) rejista keixa haat ne’ebé akontese iha kampãna segunda volta entre kandidatu ho númeru sorteiu 1 José Ramos Horta no númeru 2 Francisco Guterres Lú Olo.

Keixa dahuluk aprezenta hosi kandidatu Francisco Guterres Lú Olo kontra kampãna kandidatu José Ramos Horta, ne’ebé hala’o kampãna iha postu administrativu Atsabe munisípiu Ermera, la tuir oras ne’ebé estabelese, tuir loloos kampãna hala’o iha tuku 16:00, maibé hala’o fali iha oras 20:00 kalan.

Notisia iha Relasaun:Abertura Kampaña Segunda Volta, Lú Olo iha Ermera no Horta iha RAEOA

Keixa daruak, relasiona ho militante hosi kandidatu na’in-rua nian ne’ebé hatún Bandeira partidu sira ne’ebé apoia kandidatu sira. Ezemplu iha Munisípiu Maliana, militante hosi kandidatu númeru 1 ba hatún Bandeira kandidatura númeru sorteiu 2, nune’e mós militante kandidatu númeru 2 ba hatún Bandeira kandidatura númeru 1 nian.

Keixa datoluk, kona-bá kazu ne’ebé akontese iha Rejiaun Administrativa Espesiál Oecusse Ambeno (RAEOA), kandidatu númeru 2 posting fali líder Karismátiku Kay Rala Xanana Gusmão nia fotografia antiga iha 2016 bainhira fó apoiu ba atuál Prezidente Repúblika Lú Olo.

Keixa dahaat mak infrasaun relasiona ho utilizasaun patrimóniu Estadu ba kampãna kandidatu Francisco Guterres Lu-Olo nian no horisehik Domingu konsege prende motorizada ida inklui karreta Estadu ida iha Maliana ne’ebé envolve hosi funsionáriu Ministériu Edukasaun Juventude no Desportu (MEJD).

“Hosi keixa hirak ne’e ami halo ona intervensaun no konsege rezolve liu hosi bolu kandidatu na’in-rua no halo xamada atu kumpre oráriu kampãna, labele impede kandidatu seluk nia kampaña liu-liu labele posting no hatún fali kandidatu seluk nia Bandeira ne’ebé ikus-mai iha ona konkordánsia atu la repete tán. Kona-bá utilizasaun patrimóniu Estadu rua ne’e ami orienta Polísia halo investigasaun, tanba deskonfia karreta Governu ne’ebé uza hasai tia nia xapa matríkula no ida ne’e la’ós krime eleitorál maibé krime pekulatu de uzu,” Vise Prezidente CNE, Domingos Barreto ba Hatutan.com via telefónika, iha Segunda (11/04/2022).

Tuir observasaun, CNE detekta mós liafuan insulta-malu iha kampãna kandidatu na’in-rua nian, maibé to’o agora seidauk simu keixa hosi kandiatu no CNE sei halo atuasaun bainhira simu keixa, tanba CNE konsidera laiha faktus no provas konkreta kona-bá liafuan insulta malu bainhira seidauk iha investigasaun no desizaun hosi Tribunál liu-liu kona-bá liafuan naukten.

Jornalista: Carmelita Isaac