Hatutan.com, (13 Abríl 2022), Díli- Kandidatu Prezidente Repúblika (PR) 2022-2027  ho númeru sorteiu rua (2), Francisco Guterres “Lú Olo”, promete sei ko’alia ho Governu atu hadi’a kualidade edukasaun iha Timor-Leste no kria kondisaun dignu ba ema ho defisiente hodi asesu ba edukasaun no saúde.

Notísia iha Relasaun: Lú Olo Agradese Ba Liquiça-oan Sira

Apoiante Kandidatu PR Francisco Guterres “Lú Olo” sira hasai foto Lú Olo iha Liquiça, foin lalais ne’e. Foto/Média Kandidatu PR Lú Olo

Kandidatu ba Prezidente Repúblika husi partidu FRETILIN ne’e hateten bainhira partisipa iha dialogu ho estudante universidade sira iha Timor-Leste ne’ebé hala’o iha Sentru Konvensaun Díli (CCD, sigla portugés), Kuarta (13/04/2022).

 Lú Olo hateten, Prezidente Repúblika nudár órgaun soberania ida ne’ebé boot tebes tanba lejitimidade ne’ebé nia iha no Prezidente Repúblika bele halo ezersísiu ba podér polítiku ida no iha kompeténsia atu hola desizaun saida de’it kona-bá nasaun ida-ne’e hodi respeita nafatin prinsípiu separasaun podér no interdependénsia órgaun soberania sira.

 “Ita sei servisu ho Parlamentu Nasionál hodi ratifika konvensaun internasionál ba ema ho defisiente hodi dignifika ita-nia kamada sosiál ida ne’ebé ita hanaran defisiente hodi garante sira nia asesibilidade ho di’ak,” Francisco Guterres Lú Olo hateten.

Ema ho defisiente iha direitu hanesan ho sidadaun sira seluk, tanba ne’e uainhira re-eleitu sei tau atensaun ba konvensaun internasionál sira ne’ebé Parlamentu Nasionál ratifika, atu nune’e, labele viola lei oan sira no liuliu konvensaun sira ne’e sei afavór ba moris dignu sidadaun sira nian.

Prezidente Repúblika, tuir Lú Olo, iha obrigasaun morál no polítika atu halo servisu sira ne’ebé pro-sidadaun sira-nia direitu no garante liberdade sidadaun hotu nian tuir Konstituisaun.

 “Buainhira ha’u re-eleitu sei halo mudansa ba situasaun hodi estabiliza Estadu ba povu nia moris no komprometidu atu garante pás no estabilidade,” Lú Olo hateten.

Kandidatu Prezidente Repúblika ho númeru sorteiu rua (2) ne’e hatutan, razaun hakarak hadi’a nasaun no povu nia moris mak sai motivasaun prinsipál hodi re-kandidata-an, tanba ne’e, bainhira re-eleitu sei garante pás no estabilidade atu sidadaun sira bele hakmatek hodi kontribui ba dezenvolvimentu nasionál ho atividade ne’ebé sira halo.

Partisipa iha komísiu ne’e estudante universidade sira  no institutu superiór sira ne’ebé eziste iha Timor-Leste, reprezentante husi partidu polítiku hanesan PLP, Os Verdes Timor, KHUNTO no movimentu sira ne’ebé apoiu kandidatura Lú Olo.

Diálogu ne’e hetan observasaun direita husi Komisaun Nasionál Eleisaun (CNE, sigla Portugés), Providoria Direitu Umanu no Justisa (PDHJ), observadór husi sosiedade sivíl, inklui observadór internasionál sira.

Jornalista: Vito Salvador