Hatutan.com, (18 Abríl 2022), Díli- Prezidente Partidu Demokratiku (PD), Mariano Assanami Sabino, husu deskulpa ba lider polítiku hotu-hotu, husu deskulpa mós bá kandidatu Prezidente Repúblika sira husi primeira volta to’o mai segunda volta, no husu deskulpa mós ba povu tomak, karik durante kampaña hasai liafuan ne’ebé afeta ba personalidade ida-idak nian no família sira-nian  ne’ebé indireta no direta.

Lee Mós : Assanami: Xanana-Horta Nia Ukun mak Eletrisidade Hale’u Timor

Prezidente Partidu Demokratiku (PD), Mariano Assanami Sabino ho kuadru PD sira halo konférensia imprensa, Segunda (18/04/2022). Foto/Hatutan.com

Prezidente PD, Mariano Assanami Sabino, liu husi konferensia imprensa ne’ebé halao iha sede nasionál  PD, Colmera,  Díli, Segunda (18/04/2022), hateten karik liafuan ruma ne’ebé lamonu husu deskulpa no husu hotu-hotu hamutuk fila fali hodi aban bá vota bá kandidatu Prezidente Repúblika períodu 2022-2027.

Lideransa PD ne’e mós husu ba inan-aman sira hotu atu nafatin hakmatek fó vontade ho seriedade atu aban 19 fulan-Abríl 20222, bá tuir eleisaun tanba sidadaun ida nia votu mak determina futuru no kontribui ba mudansa iha rai ida-ne’e.

Nia afirma maske iha rumoris barak mak mosu dehan iha kilat ilegál no ameasa oioin ne’ebé iha ne’e inimigu bá demokrasia lalika fiar boatu no rumores sira-ne’e  hanesan sidadaun tenke firme iha prinsipiu no hakat bá sentru votasaun hodi fó votu.

“Hanesan partidu demokratiku iha responsabilidade atu hatoo katak lalaok sira ne’ebé amiasa povu ho intimidasaun oioin ne’e, anti demokratiku  tamba ita-nia país proklama nu’udár repúblika demokrátiku, nune’e sidadaun hotu tenke kontribui para prosesu demokratizasaun bele lao di’ak iha ita-nia rain,” Assanami subliña.

Ba joven sira hotu atu fila bá idak-idak nia hela fatin kontribui ba pás no estabilidade no iha responsabilidade atu vota tanba la’ós vota tinan lima, maibé vota bá prosesu konstrusaun Estadu. Ba polítiku no ukun na’in sira hotu tenke iha konviksaun ida atu simu rezultadu ne’ebé mai husi povu.

“Vox populi vox Dei tamba ne’e rezultadu eleisaun se deit mak eleitu ita hotu tenke simu ida ne’e,” Mariano Assanami Sabino tenik.

Jornalista: Vito Salvador