Hatutan.com, (26 Abril 2022), Díli—Ministériu Finansas (MF) serbisu hamutuk ho Ajénsia Nasionál ba Planeamentu, Monitorizasaun  no Avaliasaun (ANAPMA) realiza sesaun traballu jornada planeamentu  ba Orsamentu Jerál Estadu (OJE) 2023.

Governu serbisu hamutuk ho Ajénsia Nasionál ba Planeamentu, Monitorizasaun no Avaliasaun (ANAPMA) realiza sesaun traballu jornada planeamentu ba Orsamentu Jerál Estadu (OJE) 2023, iha Auditóriu Ministériu Finansa (MF). Foto/Hatutan.com.

Semináriu nasional jornada planeamentu OJE 2023 ne’ebé ho tema, “Hamutuk, ita identifika medidas prinsipál ba OJE 2023  hodi rekupera ekonomia no promove kresimentu ekonómiku ida ne’ebé sustentável no inkluzivu”.

Lee Mós: KM Halo Alterasaun Dahuluk ba Lei OJE 2022

Partisipa iha semináriu nasionál ne’e Xefe Governu no Membru governu VIII governu konstituisionál, Prezidente Autoridade munisipál sira inklui Prezidente instituisaun autonoma ne’ebé tutela ba ministériu relevante sira.

Primeiru Ministru (PM), Taur Matan Ruak, iha diskursu abertura hateten Timor Leste presiza dezenvolvimentu ida integradu no atualmente moduladu ho planeamentu ida-diak tanba nu’udár país demokrátiku Timor Leste tenke adopta modelu dezenvolvimentu sira ne’ebé iha sistematizasaun no iha orientasaun klara ba bem estár povu nian.

Atu dezenvolvimentu la’o di’ak presija evita arbitraridade katak idak-idak hanoin no halo tuir nia hakarak.

Tanba ne’e tenke sistematiza aktu no komportamentu sira tuir planu signifika membru governu ida sai ida tama no diretór sira bele troka tún sa’e maibé tuir nafatin sistema ne’ebé iha no la’ós inventa sasan.

Ida seluk maka tenke iha Planeamentu ida hosi leten tún to’o kraik (top too down) sustentabilidade ho orientasaun klara atu lori dezenvolvimentu ba iha ne’ebé tuir orientasaun hosi planu mestre sira ne’ebé iha.

“Rekursu oitoan ne’ebé ita iha, ita bele uza ho didi’ak hodi apoia ita nia nesesidade. Normalmente nesesidade aumenta mais rekursu menus ka la to’o. Entaun, rasionalidade ne’e importante tebes atu bele garante sustentabilidade,” Taur Matan Ruak  hateten iha MF, Díli, Tersa (26/04/2022).

Perante partisipante sira Xefe governu husu atu hotu-hotu tenke iha sentimentu de pertense ba rai ida ne’e tanba ne’e tenke halo buat hotu-hotu ho prinsípiu nu’udár Timoroan no na’in ba rai ida-ne’e.

Halo buat oitoan hodi muda buat barak liu hosi prinsípiu ida atu serbisu ho dedikasaun, nune’e ema sei la sukat nia susesu hosi podér ne’ebé iha, maibé hosi rezultadu serbisu ne’ebé presta.

Iha fatin hsnesan Ministru Finansas, Rui Gomes hateten jornada planeamentu ne’e nu’udár jornada dahuluk ne’ebé VIII governu konstituisionál halo hafoin restaurasaun independénsia tinan 20-liu.

Tanba ne’e, oportunidade ne’e parte hotu-hotu sei diskute medida prinsipál sira ba OJE 2023 ho objetivu atu rekupera ekonomia no promove kresimentu ekonómiku ida ne’ebé sustentável liu.

“Hakarak informa ba ita boot sira katak medida sira ne’ebé ita sei diskute mai hosi preparasaun tékniku sira nian liu hosi rekolla medida sektoriais no konsultasaun téknika ho entidade tomak ne’ebé hola parte iha OJE nian,” nia hateten.

MF halo analize ba lista medidas ne’ebé mai hosi entidade tomak hodi asegura katak medida sira ne’e alinea ona ho planu dezenvolvimentu VIII governu nian, no planu estratéjiku sektorial no planu estratéjiku sira seluk ne’ebé governu ne’e iha liu hosi ANAPMA.

Jornalista: Vito Salvadór