Hatutan.com, (26 Abríl 2022), Díli—Komisáriu Adjuntu Comissão Anti Corrupção (CAC) ba Serbisu Asuntu Prevensaun no Sensibilizasaun, Luis Sampaio konsidera katak, atu atinje boa governasaun ho dalan prevensaun ba korrupsaun.

Funsionariu foun hosi Ministériu Saúde, Ministériu Defeza no Ministériu Interiór hamutuk na’in 132, partisipa iha kursu indusaun temin ne’ebé fasilita husi Institutu Nasionál Administrasaun Públiku iha edifisiu INAP Comoro, Dili, Tersa (26/04/2022). Foto/CAC.

Luis Sampaio ko’alia asuntu ne’e bainhira sai oradór ba funsionariu foun husi intituisaun Ministériu Saude, Ministériu Defeza no Ministériu Interiór hamutuk na’in 132, iha kursu indusaun temin ne’ebé fasilita husi Institutu Nasionál Administrasaun Públiku iha edifisiu INAP Comoro, Dili, Tersa (26/04/2022).

Lee Mós: Projetu Instalasaun Set-top Box RTTL,E.P, CAC Bolu Ona Sasin Na’in-Ualu

Komisariu Adjuntu Sampaio iha eventu ne’e introdús konseitu báziku korrupsaun ba partisipante sira katak, korrupsaun nu’udár krime ne’ebé kontra lei hanesan temi iha lei kódigu penál ho forma sira korrupsaun pásiva, korrupsaun ativa, pekulatu, pekulatu de uzu, abuzu podér, tráfiku influénsia, partisipasaun ekonomia iha negósiu no subornu.

Advertisement

Iha lei nú 7/2020-MPCC korrupsaun ho forma sira konflitu interrese, korrupsaun iha setór privadu, pekulatu iha setór privadu, fraúde iha kontrusaun, pose riqueza injustifikada no brankeamentu kapitál (fase osan).

Komisáriu Adjuntu Sampaio introdus kle’an liu tan katak, korrupsaun tuir lider mundiál sira konsidera nu’udár moras aat ne’ebé impede nasaun atu dezenvolve-an no atinje poténsia sira.

Korrupsaun nia efeitu destroi totalmente valór sira étika no morál nian nu’udár umanidade. Hanesan Papa Fransisco iha nia diskursu deskreve katak, “korrupsaun nu’udár moras kánkru ne’ebé destroi no ameasa vida sosiedade”.

Komisáriu Adjuntu Comissão Anti Corrupção (CAC) ba Serbisu Asuntu Prevensaun no Sensibilizasaun, Luis Sampaio. Foto/CAC.

“Korrupsaun moras króniku ida ne’ebé afeta ba ema nia valór morál nu’udár umanu ne’e sai dodok. Uluk ita nia bei-ala sira la iha edukasaun aas, maibé valór morál ne’e aas. Ohin loron edukasaun aas ho maioria S1, S2, S3 maibé valór morál iha realidade mukit loos. Iha rai seluk, korruptór sira ema kaer sai iha televizaun no média sosiál, nunka sente moe iha públiku, Timor bainhira sosiedade la edukadu sei sai toman aat mós hanesan rai seluk,” Adjuntu Sampaio, hateten.

Sampaio mós sita akademista sira nia hanoin katak, korrupsaun nu’udár krime ne’ebé estra-ordináriu, signifika oho sosiedade ekonomikamente.

Korruptór sira kontinua moris prosperu iha prezente ba futuru ida rohan laek, no sosiedade ne’ebé kbiit mukit liu kontinua sofre kondisaun sosiál no ekonómiku oioin iha nesesidade bázika lorloron no jerasaun sira mai kontinua halerik.

Advertisement

Adjuntu CAC ko’alia ba partisipante sira nu’udár funsionáriu públiku Estadu nian atu konsiente-an hodi prevene-an hosi krime sira korrupsaun nian.

Funsionáriu públiku sira nu’udár mákina Estadu servisu ho laran moos, nune’e kontribui ba governasaun ida moos no justu.

Husu atu rona iha tilun tau iha prátika, liu-liu tane aas prinsípiu sira boa governasaun nian hanesan transparante, akuntável no responsável.

Jornalista: Carmelita Isaac

Advertisement