Hatutan.com, (27 Abríl 2022), Díli- Prezidente eleitu, José Manuel Ramos-Horta, Kuarta (27/04/2022), iha Palásiu Prezidensiál, Díli, hasoru-malu ho Prezidente Repúblika (PR), Francisco Guterres “Lú Olo” hodi hahú ko’alia estratéjia no formatu  diálogu  ho lider nasionál sira.

Prezidente Eleitu, José Manuel Ramos-Horta. Foto/Hatutan.com

Iha sorumutuk ne’e ko’alia mós asuntu balun relasiona ho prosesu serimónia entrega podér, inklui mós ko’alia preparativus sira kona-bá selebrasaun festa restaurasaun independénsia ba dala-20 (20 Maiu 2002-2022) ne’ebé sei konsentra iha Tasitolu, Díli.

Prezidente Eleitu, José Ramos Horta hateten, haree husi preparasaun no prosesu sira ne’ebé iha hatudu laiha difikuldade ruma no nia parte hato’o admirasaun no respeita ba Prezidente Repúblika nia esforsu hamutuk ho komisaun organizadora ba preparativus tomak.

“Ha’u oferese an para bá oin buat ne’ebé prezidente presiza nu’udár Xefe Estadu konta ho ha’u no uainhira ha’u kaer knar ne’e sei konsulta mós ho prezidente Lú Olo kona-bá a oin kestaun nasionál ka internasionál,” José Ramos-Horta bá jornalista sira.

Haree ba situasaun ekonomia mundiál no situasaun real Timor-Leste nian,  tuir Ramos-Horta, iha tinan sira mai ne’e nu’udár dezafiu boot iha área barak no liuliu área sira importante tetebes mak ekonomia ne’ebé la’ós knar prezidente nian, maibé kuandu haree krize ekonómika, sosiál no umanitária ne’e  labele hateten ona katak ne’e la’ós knar prezidente nian, maibé ne’e prezidente iha autoridade para mobiliza Governu, Parlamentu no komunidade internasionál para fó resposta ba krize ida ne’e liu husi dalan diálogu.

“Ita sei halo diálogu no ohin hahú daudaun ona ho PR no ha’u hahú tiha ona ho lider nasionál balu klaru ho maun boot Xanana no enkontru mós ho element balun membru Governu,” Ramos-Horta hateten.

 Jornalista: Vito Salvador