Hatutan.com (04 Maiu 2022), Díli—Tribunál Distritál Díli (TDD), iha Kuarta 04 fulan ne’e liu hosi juiz kolektivu Alvaro M. Freitas, Argentino Luíza Nunes, José Gonçalves kontinua hala’o julgamentu krime furtu agravadu ne’ebé deskonfia involve eis Prezidente Parlamentu Nasionál (PPN), atuál deputadu bankada CNRT arguidu Adérito Hugo da Costa, relasiona ho dada ahi illegál iha tinan 2016.

Tuir ajenda TDD katak, iha loron 04 fulan ne’e sei halo leitura sentensa ba arguidu, maibé seidauk bele tanba juiz Argentino Luíza Nunes ho kondisaun kolen ka moras tanba atende kazu barak.

Lee Mós:MP Alega Adérito Hugo ho Pena Suspensaun Tinan-rua

Ho razaun ne’e, Tribunál marka hikas audiénsia ba loron seluk hodi rona leitura sentensa.

Antes ne’e, liu hosi alegasaun hosi MP ne’ebé reprezenta hosi Prokuradór Rogeiro Viegas husu ba Tribunál atu aplika pena prizaun tinan rua, maibé suspende ba tinan rua.

Antes ne’e, tuir akuzasaun hosi Ministériu Públiku (MP), katak iha loron 02 fulan Maiu tinan 2016, bazeia ba relatóriu kontájen enerjia ne’ebé relata hosi EDTL hatudu katak, arguidu gasta enerjia normál $120 kada fulan, maibé realidade lista uza enerjia hahú fulan Juñu tinan 2016 to’o fulan Agostu 2017, arguidu gasta enerjia maioria entre $19 to’o $37.

Nune’e, depois de halo komparasaun kontájen ba gastu normál ho montante $120, konklui katak hahú periudu Juñu 2016 to’o Agusto 2017, arguidu nia konduta hamosu ona prezuizu ba Estadu ho montante globál $9,760.

Ho hahalok arguidu, MP akuza arguidu ba prátika krime furtu agravadu ne’ebé previstu iha artigu 251 no artigu 252 hosi kódigu penál TL.

Audiénsia julgamentu prezide hosi juis kolektivu Alvaro M. Freitas, Argentino Luíza Nunes, José Gonçalves, MP reprezentua hosi Prokuradór Rogério Viegas no arguidu hetan asisténsia legál hosi Advogadu Privadu Pedro Aparicio.

Jornalista: Carmelita Isaac