Hatutan.com, (12 Maiu 2022), Díli—Timor-Leste (TL), sei adopta dokumentu Fraternidade Umana iha kurrikulu nasionál.

Kona-bá ne’e, Prezidente Repúblika eleitu, José Manuel Ramos-Horta hasoru-malu ho Prezidente Parlamentu Nasionál (PPN), Aniceto Guterres, hodi deskute progressu no prosesu kontinuasaun Parlamentu Nasionál nian ba atualizasaun dokumentu ne’e.

Lee Mós: Papa Francisco Simpatia Boot atu Vizita TL iha 2022

Deklarasaun Fraternidade Umana ne’ebé Timor-Leste sei adopta ba kurrikulu nasionál ne’e nu’udár dokumentu ida ne’ebé mai hosi inisiativa Papa Francisco ho Grand Imán hosi Meskita Al-Azhar Kairo.

Prezidente Repúblika eleitu, José Ramos-Horta ba Jornalista sira hafoin hasoru malu ho PPN, Kinta (12/05/2022) hateten, deklarasaun kona-bá fraternidade umana ne’e Asembleia Jerál Organizasaun Nasaun Unida (ONU) rasik, tinan hirak liubá halo ona rezolusaun ida atu sai hanesan loron mundiál no dokumentu ida ne’e Amu Papa rasik ho Gran Imán mak halo iha tinan 2019.

Liu hosi dokumentu importante ne’e, autór prinsipál hanesan Amu Papa ho Gran Imán apela ba Governu sira iha mundu tomak atu adopta nu’udár dokumentu nasionál atu bele tama iha kurrikulu eskola nian hodi eduka, sensibiliza no inspira joven sira no sosiedade tomak ba buat importante tebtebes mak hametin dame iha rai hotu-hotu.

“Amu Papa Francisco no Gran Imán husu atu dokumentu Fraternidade Umana sai dokumentu edukativa ida atu tulun foinsa’e sira no eduka sosiedade ne’e ba hametin dame iha mundu,” José Ramos-Horta hateten.

Fraternidade Umana iha juri internasionál ida ne’ebé iha Amu Papa Francisco no Gran Imán nia okos no Prezidente eleitu rasik halo parte no ko’alia ona ba ida-ne’e, desde 2021 to’o oras ne’e hola parte iha ekipa juri no úniku hosi nasaun sira iha Azia.

Liu hosi Fraternidade Umana sei estabelese prémiu internasionál ba sidadaun ka péritu sira ne’ebé merese tuir observasaun no avaliasaun hosi juri sira no iha tinan ne’e halo iha Abu-Dhabi, maibé Prezidente eleitu la marka prezensa tanba Timor-Leste iha hela periúdu eleisaun.

“Ha’u ko’alia ho lider sira hotu-hotu, Prezidente Parlamentu Nasionál, Sekretáriu Jerál Partidu FRETELIN Mari Alkatiri, Primeiru Ministru Taur Matan Ruak,  Prezidente Repúblika Francisco Guterres Lú Olo no Maun boot Xanana no sira hotu konkorda atu Timor-Leste adopta dokumentu ida-ne’e ba kurrikulu nasionál,” nia informa.

Sorumutu ida-ne’e halo atu rona no haree prosesu iha Parlamentu Nasionál la’o oinsa no PPN informa katak, bankada Parlamentár sira, hotu-hotu konkorda no PN prepara ona rezolusaun ida atu plenária bele aprova.

Bainhira Parlamentu Nasionál halo aprovasaun ba dokumentu Fraternidade Umana ne’e, Timor Leste sei sai hanesan primeiru país iha mundu, ne’ebé Parlamentu Nasionál no Estadu adopta desizaun ida atu halo dokumentu ne’e sai dokumentu ofisiál no haruka tuir kanál Governu nian ba Ministériu Edukasaun depois iha tempu ne’ebé bele hahú tama iha kurríkulu eskola sira nian.

Jornalista: Vito Salvadór