Hatutan.com (19 Maiu 2021), Díli—Tribunál Distritál Dili (TDD) iha Kinta 19 fulan ne’e, hala’o primeiru julgamentu ba krime omesídiu nesesáriu ne’ebé deskonfia involve arguidu AMG, tanba ho kondisaun lanu hodi dudu mate Ricardo Soares.

Iha audiénsia julgamentu, arguidu deklara faktus balun loos no balun la loos, tanba momentu ne’ebá arguidu ho vítima dudu-malu maski ho kondisaun lanu, maibé depois de arguidu dudu vítima monu ba rai polisia mós ba kaer kedan arguidu. 

Motivu loloos hosi akontesimentu ne’e, tanba deit arguidu baku ninia subriña ida maibé halai fali ba vitima nia uma.

Tanba ne’e, bainhira arguidu ba bolu vitima maka sai fali mai tanba ne’e arguidu ho vítima dudu-malu no arguidu la hatene katak, nia dudu vitima monu tun ba rai no hirus matan baku iha fatuk.

Hafoin rona arguidu, Tribunál adi’a hikas julgamentu ba loron seluk hodi kontinua rona sasin sira.

Antes ne’e, tuir akuzasaun hosi MP katak iha loron 08 Agostu 2020, arguidu ho kondisaun lanu baku nia subriña to’o iha vítima nia uma, iha ne’ebá arguidu bolu nia subriña ko’alia ho lia-fuan mal.

Tanba ne’e, vítima mai hakalma arguidu, maibé arguidu tolok fali vítima nia feen hodi hakbesik ba vítima dudu vitima monu ba rai hodi baku hirus matan ba fatuk no ikus mai rezulta vitima lakon-vida.

Ho situasaun ne’e maka MP akuza arguidu ba pratika krime omesídiu nesesária ne’ebé previstu iha artigu 138 hosi kódigu penál TL.

Audiénsia julgamentu prezide hosi juiz kolektivu, Ana Paula Fonseca, Maria Solana, António do Carmo, MP reprezenta hosi prokuradór Osório de Deus no arguidu hetan asisténsia legál hosi Advogadu Privadu.

Jornalista: Carmelita Isaac