Hatutan.com, (03 Juñu 2022), Díli– Ministériu Interiór (MI) hamutuk ho Komandu Jerál Polísia Nasionál Timor-Leste (PNTL), Sesta (03/06/2022), distribui tán karreta operasionál hamutuk 29 bá iha PNTL munisípiu 12, inklui Rejiaun Administrativa Espesiál Oé-Cusse Ambeno (RAEOA).

Lee Mós : Projetu Dekretu-Lei Kona-bá Alterasaun Orgánika PNTL Aprovadu

Karreta operasionál foun bá PNTL. Foto/Hatutan.com

Apoia transporte sira-ne’e hodi fasilita no haforsa membru sira hala’o servisu iha terrenu ho di’ak liután.

Karreta 29 ne’e; 16 entrega ba unidade Polísia Tránzitu (Poltranz), no  14 ba Unidade Pesoál Vulnerável ka Vulnerable Person Unit (VPU).

Vise-Ministru Interiór (VMI), António Armindo, dehan, karreta operasionál ho unidade hamutuk 29 ne’e sosa ho osan estadu nian, ne’ebé mak prevee iha Orsamentu Jerál Estadu (OJE) tinan 2022 nian ho montante hamutuk millaun $1,1.

António Armindo afirma tán, apoiu hirak ne’e, la’ós to’o de’it iha ne’e, maibé, tuir planu ministériu nian, iha tinan ida ne’e mós, sei sosa tán karreta operasionál ho unidade hamutuk 61, hodi distribui ba Eskuadra PNTL sira hotu iha territóriu Timor-Leste.

Prosesu atu sosa tán karreta 61 ne’e, iha ona Comissão Nacionál de Aprozionamento (CNA), hodi halo hela verifikasaun no aprovasaun. Nune’e, molok fulan-Dezembru, tinan ne’e, Eskuadra sira tenke iha hotu ona karreta rasik.

Alende ne’e, governu liuhosi MI, sei sosa tán fasilidade sira hanesan Rádiu Komunikasaun, kondisiona torre sira, liu-liu balu halo konstrusaun foun.

António Armindo, agradese ba membru sira Parlamentu Nasionál nian, liuhosi deputadu sira iha Komisaun B, ne’ebé mak fó ona apoiu tomak ba MI, hodi defende orsamentu ne’ebé prevee atu sosa karreta ba Komandu PNTL.

Kompañia ka ajénsia ne’ebé responsabiliza ba sosa no hatama karreta sira ne’e mai Timor-Leste maka Toyota, hosi timoroan rasik.

Iha fatin hanesan, Komandante Jerál PNTL, Komisáriu Polísia Faustino da Costa, hateten, iha preparasaun ba OJE tinan 2o22 nian, liuhosi Vise Ministru Interior, aprezenta mós planu Komandu PNTL nian, ne’ebé prevee osan hodi karreta ba PNTL. Maibé, ikus mai, orsamentu ida ne’e, la konsege pasa iha parte Komisaun ba Revizaun Orsamentu ho Programa (CROP-Sigla Portugés) nian.

“Haree bá situasaun ida ne’e, no ho mós situasaun ne’ebé PNTL hasoru, inklui fiskalizasaun sira hosi deputadu PN iha terrenu, ikus mai, koloka osan hamutuk millaun $4, nune’e bele sosa viatura operasionál ba PNTL iha 2022 nia laran, iha área seguransa Rodoviáriu hamutuk 15, Pesoál Vulnerável  (VPU) 14, no ba eskuadra sira, ho totál karreta hamutuk 61,” Komisáriu Faustnio da Costa, hateten iha diskursu.

Maske karreta balu to’o ona, no halo ona mós distribuisaun ba kada diresaun sira iha munisípiu hotu, maibé, iha fulan-Outubru 2022 ne’e, karreta hamutuk 61 sei to’o, hodi kompleta deskrisaun bá Eskuadra PNTL sira hotu iha TL.

Iha tinan barak nia laran mós, PNTL sempre aprezenta situasaun ida mak la’ós de’it ba área operasionál nian, maibé mós iha área lojístika nian. Nune’e, hahú iha 2020, PNTL hetan orsamentu hodi sosa karreta bá eskuadra sira hotu, ho viatura operasionál hamutuk 15.

Iha 2021, liuhosi esforsu Ministru Interiór, Taur Matan Ruak, no Vise MI, António Armindo, konsege sosa tán viatura hamutuk 21 ba PNTL, no ikus mai distribui kedas bá iha Eskuadra sira territóriu nasionál.

Jornalista: Rogério Pereira Cárceres