Hatutan.com, (08 Juñu 2022), Díli—Komisáriu Comissão Anti-Corrupção (CAC), Sérgio Hornai akompaña hosi Komisáriu Adjuntu ba Asuntu Investigasaun Kriminál Augusto Castro, Diretór Investigasaun José Verdial no Xefe Unidade Informasaun no Seguransa Euclides Madeira simu vizita kortezia hosi autór prinsipál Masakre Santa Cruz 12 Novembru 1991, ne’ebé oras-ne’e hamahon-an iha Komité 12 Novembru, iha Salaun Sorumutu CAC nian Faról Díli.

Komisáriu Comissão Anti-Corrupção (CAC), Sérgio Hornai akompaña hosi Komisáriu Adjuntu ba Asuntu Investigasaun Kriminál Augusto Castro, Diretór Investigasaun José Verdial no Xefe Unidade Informasaun no Seguransa Euclides Madeira simu vizita kortezia hosi autór prinsipál Masakre Santa Cruz 12 Novembru 1991, ne’ebé oras-ne’e hamahon-an iha Komité 12 Novembru, iha Salaun Sorumutu CAC nian Faról Díli,Kuarta (08/06/2022). Foto/CAC.

Xefe Delegasaun Komité 12 Novembru 91, Jacinto Alves mai halo audiénsia ho objetivu atu fornese informasaun inisiál kona-bá projetu konstrusaun “Monumentu Masakre 12 Novembru 1991” nian ne’ebé responsabiliza hosi Ministériu Asuntu Veteranus no Kombatentes Libertasaun Nasionál.

Lee Mós: CAC-UNDOC Avalia Rísku Korrupsaun Iha Aprovizionamentu Setór Saúde TL

Delegasaun Komité 12 Novembru 1991 esplika ba Komisáriu Sérgio ho estrutura Investigasaun Kriminál CAC nian hodi loke orizonte no informasaun útil, hodi halo asaun nune’e bele mellora di’ak liu tán servisu Komisaun nian.

Advertisement

“Iha sorumutu ne’e Jacinto Alves ho delegasaun mai halo audiénsia la’ós atu mai hato’o keixa ba Komisáriu ho estrutura Investigasaun Kriminál nian, maibé halo audiénsia ho intensaun atu CAC halo totál maneira oinsa bele akompaña prosesu konstrusaun Monumentu Masakre 12 Novembru 1991 nian iha rate Santa Cruz, nu’udár memória istóriku hodi rai-hela ba jerasaun Timorense tuir-mai ho kualidade di’ak,” Hatutan.com sita komunikadu.

Iha oportunidade audiénsia kortezia ida-ne’e, Komisáriu Sérgio esplika ba former freedom fighters urbana no eis prisoneiru sira kona-bá misaun no vizaun Komisaun nian iha ne’ebé hala’o knaar tuir lei Númeru 8/2009 15 Jullu fó mandatu rua; Investigasaun Kriminál no Prevensaun Kriminál.

Esplika mós ba Mate Restu Massakre 12 Novembru nian kona-bá lejislasaun foun Númeru 7/2020 Medidas Prevensaun no Kombate Korrupsaun (MPCC) ne’ebé fó podér boot liu tán mai CAC iha implementasaun luta prevene no kombate korrupsaun iha rai doben Timor-Leste.

Alende esplika lala’ok servisu Investigasaun Kriminál no Prevensaun Kriminál korrupsaun, esplika mós ba lideransa mate restu masakre 12 Novermbru 1991, lidera hosi Jacinto Alves kona-bá Diresaun seluk ne’ebé sai “dapur” ba Komisaun nian iha área administrasaun no finansas; Diresaun Servisu Apoiu no Kooperasaun (DSAK).

CAC esforsu prevene no kombate korrupsaun halo maka’as iha Terseira Mandatu Komisáriu nian maske sei iha frakeza servisu sira iha ne’ebé presiza kamada sosiedade Timorense tomak nian kontribuisaun hodi konkretiza mehi boot Timoroan sira nian iha luta sagradu ida ne’e iha tempu Ukun Rasik An.

Advertisement

CAC husu ba Komité 12 Novembru ho ninia istória eroíku iha pasadu nu’udár freedom fighter Urbana nian bele tulun CAC hodi konsiensializa Timoroan tomak atu Timor-Leste bele livre hosi kriminalidade korrupsaun ba moris di’ak Asswai’n sira ne’ebé mate ba kauza Ukun Rasik-An.

Maski sorumutu ida-ne’e nu’udár audiénsia kortezia maibé, Komisáriu Sérgio Hornai ho estrutura investigasaun criminal agradese ba informasaun sira revela durante diskusaun no konsidera audiénsia ida-ne’e nu’udár informasaun preliminária ida hanesan denúnsia no keixa iha ne’ebé Komisaun sei rejista no iha posibilidade sei foti medidas bainhira akontese indikasaun infrasaun no krimi ruma.

CAC kompromitidu katak ho informasaun inisiál sira ne’ebé delegasaun Komité 12 Novembru 91, fornese sei loke dalan ba CAC atu halo akonselamentu ba Ministériu ba Asuntu Veteranus no Kombatentes Libertasaun Nasionál no hahú servisu rekolla informasaun kona-bá prosesu tomak bainhira presiza tuir lei.

Jornalista: Carmelita Isaac

Advertisement