Hatutan.com, (09 Juñu 2022), Díli—Ministru Justisa (MJ), Tiago Amaral Sarmento fó apoiu ba Organizasaun Naun Governamentál Rede ba Rai atu kontinua halo advokasia ba problema rai ne’ebé durante ne’e sidadaun sira enfrenta.

Ministru Justisa Tiago Amaral Sarmento hamutuk koordenadór Nasionál Rede ba Rai, Hortencio Pedro Vieira ho ekipa, Rua Colmera, Díli, Kinta (09/06). Foto/Média MJ.

Ministru Justisa espresa sentidu apoiu ne’e bainhira hala’o reuniaun ho koordenadór Nasionál Rede ba Rai (RbR), Horténcio Pedro Vieira ho ekipa iha knaar fatin Minitériu Justisa, rua Colmera, Díli, Kinta (09/06).

Lee Mós: Ministru Justisa Aumenta Funsionáriu iha Serbisu Notariadu Díli no Orienta Hadi’a Sistema Atendimentu

“Ha’u apresia tebes ba ita boot sira nia servisu, knaar no papél importante. Rede ba Rai tenke esforsu nafatin atu mantein hanesan organizasaun naun governamentál ne’ebé tau-matan ba rai. Tanba, kestaun rai sidadaun sira nian, presiza ema balun atu tau-matan, se-tilun, rona no hatutan  sira nia lian, presiza sosiedade sivíl tenke iha, ita nia papel mak tau-matan ba ida-ne’e,” Hatutan.com sita deklarasaun Ministru Justisa iha komunikadu.

Tiago mós promete katak, durante mandate hanesan Ministru Justisa sei fó apoiu másimu ba Rede ba Rai atu bele defende sidadaun sira nia rai, liuliu fó advokasia ba sidadaun sira ne’ebé enfrenta problema kona-bá rai.

“Durante ha’u nia mandatu, ha’u apoia tebetebes. Se ita boot sira mantein nafatin organizasaun ida ne’e. Iha Rede ba Rai, ha’u apoiu nu’udár Ministru Justisa, Ministru ne’ebé tau-matan ba asuntu rai no propriedade, apoiu sosiedade sivíl nia ezisténsia no papél hanesan defensór ba rai,” nia hateten.

Ministru Justisa husu mós ba Rede ba Rai atu halo Komunikasaun, koordenasaun no Kooperasaun ne’ebé di’ak ho Ministériu Justisa ka bele mós diriji direta ba Ministru Justisa.

“Nu’udár Ministru Justisa ha’u husu ba Rede ba Rai atu bele komunika malun lalais hodi buka solusaun tanba sidadaun sira barak tebes mak  enfrenta problema kona-bá rai. Bainhira iha problema ruma tenke haruka kedan karta ba Ministru atu bele hetene loloos kona-bá kazu sira ne’e, tanba rekursu umanu ne’ebé serbisu iha parte Terras no Propriedade no Serbisu Kadastru menus tebes,” nia husu.

Durante ne’e Ministru Justisa iha ona progresu servisu balun ne’ebé halo ona no esforsu atu bele atribui titulu na’in ba rai ba Komunidade sira iha tinan ida-ne’e no fó prioridade ba regulariza propriedade Estadu nian.

Rede ba Rai mós hato’o kazu sira ne’ebé mak durante ne’e advoka mak hanesan, kazu Caicoli, Sidade Universitáriu Aileu, Manleuana, Metinaro, Gembel Art no problema ka failansu sira hosi implementasaun lei ba rai no lei espropriasaun. 

Koordenadór Nasionál RbR husu ba Ministru Justisa atu tau prioridade ba sosializasaun lei ba rai, tanba komunidade maioria mak seidauk komprende Lei Númeru 13/2017).

Rede ba Rai mós prontu atu koopera ho Governu, bainhira iha konfiansa hodi habelar ka disemina lei kona-bá rai nian ba sidadaun sira.

Inisiativa atu konvoka audiénsia ida ne’e mosu tanba iha observasaun lubuk ida ne’ebé durante ne’e RbR halo ona relasiona ho politika Rai nian iha periudu tinan hirak ikus ne’e.

Lee Mós:Arrendamentu Rai ba Pelican Paradise Tinan 50, Vise MJ Kumpre Desizaun KM

Jornalista: Carmelita Isaac