Hatutan.com (20 Juñu 2022), Díli—Tribunál Distritál Díli (TDD) iha Segunda 20 fulan ne’e kontinua hala’o julgamentu ba krime omesídiu agravadu ne’ebé deskonfia involve arguidu na’in 18, tanba oho no so’e ona vítima Henrique Soares iha arredór Universidade da Páz (UNPAZ).

Sala julgamentu TDD.

Arguidu na’in 18 mak hanesan FP, FT, DIdC, FdC, QB, SP, JL, JP, AV, LS, JS, JdS, DP, LdS, ZC, GP, NI no JC.

Lee Mós: Omisídiu UNPAZ, Arguidu AV Nega La Oho no Subar Vítima

Iha julgamentu kontinuasaun ne’e, arguidu FdC laiha koñesimentu kona-bá vítima nia mate, tanba arguidu nia aman mós membru Polísia Nasionál Timor Leste (PNTL), tanba ne’e bainhira iha problema ruma nia aman mós sempre hatene.

Maski nune’e, arguidu deklara antes ne’e katak, vítima iha problema privadu ho arguidu ZC, maibé kona-bá saida nia parte la hatene.

Hafoin rona arguidu, Tribunál adi’a hikas julgamentu ba loron seluk hodi kontinua rona arguidu sira seluk.

Ministériu Públiku (MP) akuza arguidu sira ba pratika krime omesídiu agravadu ne’ebé previstu iha artigu 139 hosi kódigu penál TL, relasiona ho kazu omesídiu ne’ebé akontese iha UNPAZ iha loron 20 fulan juñu 2021 ne’ebé hamate ona vitima Henrique Soares.

Audiénsia julgamentu prezide hosi juiz kolektivu José Gonçalves, Argentino Nunes, Alvaro Maria Freitas no MP reprezenta hosi Prokuradór Matias Soares, arguidu sira hetan asisténsia legál hosi Defensór Públiku Fernando no Advogada Privada Adelina Lobo, Virna Carvalho no Manuel Tilman.

Jornalista: Carmelita Isaac