Hatutan.com, (24 Juñu 2022), Díli– Policia Ciêntífica e de Investigação Criminál (PCIC), Sesta (24/06/2022), kaptura  sidadaun estranjeiru na’in-rua (2) ne’ebé deskonfia envolve iha sindikatu tráfiku umanu relasiona ho haruka traballadora timoroan  na’in-hitu (7) ne’ebé daudaun ne’e “abandonada” hela iha sidade Abudabi, Uniaun Emiradu Árabe.

Lee Mós : SERVE Seidauk Atribui Lisensa Bá Ajénsia Hodi Halo Rekrutamentu Traballadór Timoroan

PCIC kaptura sidadaun estranjeiru na’in-rua ne’ebé deskunfia envolve iha sindikatu trafiku umanu. Foto/Espesiál

Sidadaun estranjeiru na’in-rua ne’e;  ida ho inisiál AES nu’udár sidadaun Bahrain no ida seluk ho inisiál IGAE nu’udár sidadaun Sudaun.   

Estranjeiru na’in-rua ne’e mai husi Indonézia, Sesta ne’e,  to’o iha  Aeroportu Internasionál Nicolau Lobato, Comoro Díli, sertamente tama kedas iha kapturasaun husi autoridade PCIC sira.

Adjuntu diretór PCIC, Adino Nunes Cabral, hateten, autór sira-ne’e PCIC halo kapturasaun bainhira viajen hosi Indonézia mai TL.  

“Ohin, ha’u simu informasaun ne’e, ita koloka kedas ekipa iha Aeroportu Internasionál Prezidente Nicolau Lobato, simu sira, no ohin loron, sira mai iha ne’e. Sira mai ona, ita kaer sira. Uza kompeténsia ita nian bá oras 12  nia laran hodi husu kedas ba Ministériu Públiku nu’udár  titulár bá asaun penál, atu solisita bá Tribunál, para bele hasai mandadu detensaun fora de flagrante delitu, kontra suspeitu na’in-rua,” Adino Cabral informa.

Lee Mós : Ramos-Horta Husu Governu Lori Fila Traballadora Timoroan iha Abudabi

Hatán kona-bá identifikasaun ajénsia ida ne’ebé loos mak durante autór sira servisu bá, Adino dehan, hela bá segredu justisa, tanba prosesu investigasaun  la’o ona. em-prinsípiu, ajénsia ida eziste iha Indonézia, ne’ebé durante ne’e simu timoroan sira hosi Timor no depois sira kanaliza bá Abudabi, Uniaun Emiradu Árabe.

PCIC kaptura sidadaun esntranjeiru na’in-rua ne’ebé deskunfia envolve iha sindikatu trafiku umanu. Foto/Espesiál

“Ita foin mak deskobre sira, depois bá oin, ita sei haree took, em-prinsípiu, na’in-rua ne’e mak autór prinsipál ne’ebé durante ne’e halo komunikasaun ho autór sira iha ne’e, para hodi transporta ita-nia timoroan sira, ne’ebé ha’u hatene ona bá imi, iha na’in-hitu ne’ebé mak agora daudaun sai vítima iha Abudabi. Na’in-rua ne’e, agora ita uza ita-nia kompeténsia polisiál  hodi hein mandadu detensaun hosi Tribunál,” Adino Cabral hateten.

PCIC halo ona koordenasaun no komunikasaun ho Adidu Seguransa Indonézia nian iha Timror-Leate hodi sinkroniza informasaun kona-bá ajénsia sira ne’ebé mak iha Indonézia.

Antes ne’e, Kuarta (22/06/2022), PCIC detein timoroan na’in-tolu iha Díli ho inisiál MV, JG ho HdS, ne’ebé sia hanesan na’in bá ajénsia ne’ebé maka rekruta traballadora timoroan sira bá “abandonada” hela iha Abudabi.

Lee Mós : Traballadora Na’in-hitu “Abandona” iha Abudabi

Jornalista: Rogério Pereira Cárceres