Hatutan.com, (25 Agostu 2022), Díli—Polísia Nasionál Timor-Leste (PNTL), liuhosi Komandu Munisípiu Díli, Eskuadra Vera Cruz, iha Kinta 25 Agostu 2022, detein autór na’in-rua ho inisiál SDF ho DM iha Sela detensaun, tanba tama sai uma komunidade nian hodi halo kobransa hamutuk $290.

Investigadór sira hosi PNTL Vera Cruz halibur hela dokumentu sira ne’ebé autór na’in-rua halo kobransa ba komunidade.

Autór na’in-rua ne’e kobra osan no bosok komunidade katak, sei hetan apoiu hosi Governu liuhosi Ministériu Solidariedade Sosiál no Inkluzaun (MSSI).

Lee Mós: PNTL Identifika Autór Halo Kobransa Ilegál iha Bebonuk

Durante tama sai uma komunidade nian, autór sira kobra osan kada ema hatama osan $10, inklui husu atu hatama mós dokumentu sira hanesan Sertidaun RDTL ho foto koloridu.

Komandu PNTL Munisípiu Díli, Superintendente Xefe Polísia, Henrique da Costa informa, iha Kinta (25/08/2022), tuku 06 oras dadeersan, PNTL Díli, liuhosi Eskuadra Dom Aleixo, simu informasaun katak, iha kazu burla ida ka ema bosok sidadaun sira iha área Dom Aleixo ninian.

Hafoin simu informasaun ne’e, parte patrullamentu ho Servisu Informasaun Polísia (SIP) parte Makikit nian, ba kedan iha fatin akontesimentu no identfika katak, iha duni mane ida mak ba iha komunidade nia uma, hodi bosok no promete katak, komunidade hatama dokumentu ho osan, depois bele trata dokumentu ba sira nune’e bele hetan prosesu ba iha apoiu sosiál ninian.

“Tanba ne’e, ita nia patrulla Dom Aleixo, ho SIP Makikit, ba kedan iha fatin no kaptura kedan autór lori mós vítima sira mai iha Eskuadra. Polisia identifika tán iha autór prinsipál ne’e, hela iha área Vera Cruz ninian. Entaun patrulla Vera Cruz ba kedan iha fatin ne’ebé mak autór prinsipál hela iha Dare ninian no ba fati kedan autór prinsipál ne’e lori mai halo prosesu iha eskuadra Vera Cruz,” Komandu PNTL Munisipiu Dili, Superindente Xefe Polísia, Henrique da Costa hateten iha kna’ar fatin komandu Caicoli, (25/08/2022).

Osan ne’e, vítima sira hatama la fó direta ba iha autór SDF, maibé liuhosi vítima sira nia kolega ida. Entaun, bainhira atu lori osan ne’e ba entrega iha autór iha ninia rezidénsia, vitima ne’e identifika katak, autór ne’e rasik mós ninia kondisaun uma-hela fatin ne’e la favóravel. Entaun, nia mos deskonfia hosi vítima, ikus mai la entrega osan ba iha suspeitu ne’e.

“Dokumentu ne’ebé hatama mak hanesan, Sertidaun RDTL ho mós foto-koloridu. Ne’e la’ós promete ba servisu, maibé hodi hatama ba iha sosiál, atu hetan ajuda ruma. Osan sira ne’ebé mak agora daudaun iha edifísiu ne’e iha $90, maibé sira seluk $200 ne’e la konsege entrega, tanba sira sei asegura hela,” Henrique da Costa, dehan.

Oras-ne’e dadaun, suspeitu sira, investigadór sira Eskuadra Vera Cruz nian, halo ona prosesu identifikasaun no kontaktu ona mós ba Prokuradór do tornu, hetan orientasaun, depois hodi aprezenta ba iha Ministériu Públiku.

Investigadór sira hosi PNTL Vera Cruz halibur hela dokumentu sira ne’ebé autór na’in-rua halo kobransa ba komunidade.

La’ós ne’e de’it, sei iha tán suspeitu prinsipál ida seluk ne’ebé mak oras ne’e sei iha Munisípiu Manufahi, no Komandu PNTL Díli komunika ona ho parte Manufahi ninian nune’e bele ajuda asegura hela suspeitu ne’e, depois mak parte munisipiu Díli ba foti.

Autór na’in-rua ne’e, ida ho inisial SDF (44), orijen hosi Munisipiu Manufahi ho profisaun hanesan profesór kontratadu no autór JM (42) orijen hosi Rejiaun Administrativa Espesial Oecusse Ambeno (RAEOA).

Vítima sira hamutuk 200-resin, maiória ema Oecusse sira balun ne’ebé mak oras ne’e daudaun hela iha Díli no balun hela iha Oecusse.

“Ita agradese ba vitima ne’ebé mak kobra ona sira seluk ninia osan, nia konsege deteta duni autór ne’e, no nia hatene katak, ida ne’e la merese hodi fornese servisu ne’e ba ema ruma. Entaun, nia la entrega osan vítima sira seluk ninian no osan ne’e nia asegura hodi lori ba entrega fila-fali ba na’in,” nia hateten.

Jornalista: Rogério Pereira Cárceres