Hatutan.com, (06 Setembru 2022), Díli- Prezidente Parlamentu Nasionál (PPN), Aniceto Longuinhos Guterres, dehan timoroan hotu iha devér moral atu presta apoiu moral no orasaun bá Dom Virgílio iha kargu foun nu’udár Kardeál hodi serbí igreja iha Timor-Leste no igreja universal.

Lee Mós : Dom Vergílio Kardeál do Carmo husu GAM ho GAR Haburas Virtude Domin

Sua Eminénsia Virgílio Kardeál do Carmo da Silva, SDB ho Bispu Dioseze Maliana, Dom Norberto do Amaral ho karreta tama iha fatin selebrasaun misa agradesimentu iha Tasi-tolu, Díli, Tersa (06/09/2022). Foto/Hatutan.com

Aniceto Guterres iha noa diskursu  misa agradesimentu Sua Eminénsia  Virgílio Kardeál do Carmo da Silva,  SDB iha Tasi-Tolu, Díli, Tersa (06/09/2022), hateten títulu Kardeál ne’ebé Dom. Virgílio hetan nu’udár orgullu bá povu no Timor-Leste hanesan nasaun. Maske ki’ik maibé hatudu Timor-Leste nia identidade fiar sarani ne’ebé ativu no moris ho dame hamutuk ho ttmoroan seluk ne’ebé profesa fiar iha relijiaun seluk.

Orgullu ne’e hatuur kedas iha istória evanjelizasaun iha Timor-Leste tempu naruk bá kotuk ne’ebé konstroi povu Timor-Leste nia identidade rasik iha sudeste aziátiku no sai fundamentu ba Timor-Leste nia independénsia.

Advertisement

“Ha’u lori povu, deputadu no servidór Estadu nian sira hotu agradese bá Nai Maromak bá grasa boot ne’ebé haraik bá ita sarani no povu Timor-Leste hamutuk ho dioseze sira hotu, na’i-lulik, madre no ema hotu liuhosi prezensa Kardeál dahuluk timoroan Dom Virgílio Kardeál do Carmo da Silva, SDB,” Aniceto Guterres hateten.

Ho kargu nu’udár Kardeál sei la preokupa de’it ho igreja katólika iha Timor-Leste maibé halo parte mós iha ministériu Sua Santidade Papa nian ho piedade no prudénsia hodi reforsa igreja universal.

Grasa ne’ebé Dom Virgílio Kardeál do Carmo da Silva,  SDB simu, Aniceto tenik la’ós tun de’it bá nia, maibé bá povu sarani tomak no bá ema ida-idak.

“Timoroan hotu iha devér moral atu presta apoiu moral no orasaun ba Dom Virgílio iha kargu foun nu’udár Kardeál atu nune’e ho sabedouria Lori nia misaun foun ne’e too rohan,” Nia subliña.

Prezidente Parlamentu Nasionál ne’e hatutan Timor-Leste nia adezaun bá deklarasaun Fraternidade Umana atu ema hotu hala’o obrigasaun nu’udár sarani ka fiar na’in  tuir ida-idak nia relijiaun nian no nu’udár sidadaun estadu direitu demokrátiku atu promove Fraternidade liuhosi hanoin, liafuan no hahalok hodi manifesta Timor-Leste nia apoiu moral no relijiaun bá promove pás no Fraternidade umana iha sosiedade relijioza.

Advertisement

“Ho deklarasaun Fraternidade Umana ema ida-idak sei kumpri nia dever nu’udár fiar na’in, polítiku, governante ka sidadaun baibain hodi hametin pás relasaun fraterna, solidariedade no toleransia konstrutiva,” Aniceto Guterres hateten.

Aniceto Guterres hato’o parabéns bá timoroan hotu iha rai-laran no mos rai-li’ur, bá sarani Katólika no mós laos Katóliku, ba igreja no nasaun nia di’ak no bá sosiedade Timor-Leste ne’ebé nakonu ho pprosperidade, solidariedade no Fraternidade.

Iha omilia Dom. Virgílio Kardeál do Carmo da Silva, SDB hateten, “ho imi sarani hotu mak ha’u klamar hahí Maromak, ida ne’ebé domin na’in, laran sadia hodi matan monu los bá uma  kreda Timor no povu Timor tamba ne’e nafatin iha esperansa no iha orasaun atu grasa sira ne’e suli nafatin bá ita ida-idak hodi lori ita-nia krús moris bá misaun ida boot liu atu sai sasin Kristu nian.”

“Ha’u husu atu ita-boot sira reza nafatin no liuliu reza mós mai ha’u ne’ebé simu kna’ar ida-ne’e,” Dom. Virgílio Kardeál do Carmo da Silva, SDB hateten.

Jornalista: Vito Salvadór

Advertisement