Hatutan.com, (19 Setembru 2022), Díli- Prezidente Repúblika (PR), José Ramos-Horta, Segunda (19/09/2022),  hasoru malu ho Primeiru-Ministru (PM)  Taur Matan Ruak  iha Rezidénsia  Estadu Primeiru-Ministru nian iha Farol, Díli, hodi konsulta ho PM Taur kona-bá asuntu importante sira vizita Estadu nian bá Nova Yorke hodi partisipa iha Asembleia Jerál Nasoins Unidus ( ONU) nian.

PR Ramos Horta ko’alia ba jornalista sira hafoin hasoru malu ho PM Taur iha Farol, Díli, Segunda (19/09/2022). Foto/Elio dos Santos da Costa

Iha enkontru ne’e, Xefe Estadu agradese señór Primeiru-Ministru ne’ebé simu nia pedidu atu hamutuk halo diskusaun balun no bele rona direita hosi Xefe Governu preokupasaun balun hosi Governu no liuliu asuntu balun hosi Governu ne’ebé hakarak Prezidente Repúblika ko’alia iha Asembleia Jerál ONU nian.

“Ha’u prepara daudaun loron sira-ne’e nia laran, diskursu orasida prontu ona, karik ha’u sei haruka bá señór Primeiru-Ministru para haree, tanba ne’e diskursu Estadu, ha’u konsulta ho señór Primeiru-Ministru ho Ministériu Negósiu Estranjeiru asuntu ne’ebé preokupa liu,” José Ramos-Horta hateten.

Asuntu ne’ebé Xefe Estadu sei hato’o iha Asembleia Jerál ne’e, primeiru asuntu nasionál, ne’e hanesan halo kuaze relatóriu  ida ba komunidade internasionál situasaun iha Timor oinsá ne’e pozitivu teb-tebes, iha draf ne’ebé hakerek tiha ona ko’alia kona-bá maneira “como” Timor-Leste enfrenta ho efikásia prevensaun Covid-19, Timor-Leste konsege duni kontrola halo jestaun di’ak bá Covid-19.

“Ha’u sei ko’alia mós kona-bá situasaun iha Ukránia impaktu bá situasaun internasionál. Ne’e mak señór Primeiru-Ministru ho ha’u ko’alia kona-bá asuntu mak ida-ne’e,” Ramos-Horta haktuir.

Primeiru-Ministru hanesan fó liberdade total ba Prezidente para ko’alia, mais nu’udar Xefe Estadu la ko’alia lori nia naran pesoál maibé lori naran Estadu nian, entaun PR nia diskursu kuaze bele hatete, relatóriu ida Timor-Leste nian ba komunidade internasionál kona-ba progresu  Timor-Leste halo iha pás iha seguransa iha rai laran, iha toleránsia polítika, toleránsia rekonsiliasaun Timor-Leste nian.

“Kuandu ita haree problema iha Myanmar, problema iha Afeganistaun, iha Yemen, Ukránia, Timor lori relatóriu ida  pozitivu hanesan “Oasis” ida kompletu trankuilidade no mós susesu ne’ebé Timor halo konsege duni ha’u testemuña ita haree uluk tinan-rua liubá kuandu Covid-19 hahú, preokupasaun boot kona-bá Covid-19 bele provoka katástrofe umanitáriu iha Timor-Leste, katástrofe sosiál, tanba ita frajil, sistema saúde frajil, povu iha ona moras oi-oin, mais afinál konsege kontrola, ne’e susesu boot,” Ramos-Horta tenik.

Jornalista: Vito Salvadór