Hatutan.com, (15 Outubru 2022), Díli—Primeiru interrogatóriu ne’ebé hala’o iha Tribunál Distritál Díli (TDD), Ministériu Públiku (MP) alega prizaun preventiva ba arguidu GDS no arguida MCS ne’ebé deskonfia envolve iha Kazu Projetu Instalasaun  Set-Top Box ba Rádiu Televizaun Timor-Leste Empreza Públika (RTTL,E.P).

Arguidu na’in-rua ba kazu Instalasaun Set-Top Box Rádiu Televizaun Timor Leste Empreza Públika (RTTL,E.P), submete ba Primeiru Interrogatóriu iha Tribunál Distritál Dili, Sábadu (15/10/2022). Foto Hatutan.com/Elio dos Santos da Costa.

Krime ne’ebé Ministériu Públiku imputa ba arguidu GDS no  arguida MCS ho krime abuzu de Podér, Brankeamentu Kapitais, Fraúde Fiskál, Partisipasaun  Ekonomia iha Negósiu no konflitu ba Interese.

Lee Mós: Kazu Instalasaun Set-Top Box RTTL,E.P, MP Akuza Krime Lima bá Arguidu Na’in-rua

Iha alegasun ne’e Ministériu Públiku reprezenta hosi Prokuradór  Matias Soares husu ba Tribunál atu aplika medida koasaun prizasaun preventiva  tanba MP haree artigu 183 kódigu penál Timor-Leste, nune’e asegura arguidu sira.

Nune’e defeza hosi arguidu sira, Arlindo Sanches husu atu Tribunál aplika pena ne’ebé adekuadu ba nia kliente.

“Ami husu labele aplika ida-ne’e tanba la tuir rekezitu 183 ne’e,” Arlindo Sanches hateten iha TDD Sábadu (15/10/2022).

Akuzasaun ne’ebé MP aprezent ba Tribunál ne’e defeza haree la loos hotu, maibé ne’e razaun hosi defeza no Tribunál mak sei tetu.

Rona tiha alegasaun, Tribunál deside adi’a hikas desizaun ne’e ba loron Domingu (16/10/2022), tuku 14:00.

Primeiu interrogatóriu ne’e prezide hosi Juíza Albertina Neves, Ministériu Públiku Reprezenta hosi Matias Soares, arguidu sira hetan assisténsia legál hosi Advogadu Privadu Arlindo Sanches, Adelina Lobo no Virna Carvalho.

Lee Mós:Kazu Instalasaun Set-Top Box RTTL,E.P, Suspeitu Na’in- Rua Sei Submete ba Primeiru Interrogatóriu

Jornalista: Vito Salvadór