Hatutan.com, (14 Novembru 2022), Díli—Camara Comercio e Indústria Timor-Leste (CCI-TL) sei hala’o nia kongresu nasionál iha loron 17 to’o loron 18 fulan-Novembru 2022. Kongresu ne’e ho objetivu atu hala’o revizaun bá estatutu CCI-TL no hili estrutura CCI-TL nian bá períodu 2022-2026.

Lee Mós : CCI-TL Preokupa Governu Hatún Folin Produtu ba Reklamante Cesta Bázika

Lourenço de Oliveira ho Jorge Serrano. Foto/Repro

Informasaun ne’ebé Hatutan.com asesu hosi komisaun organizadora kongresu nasionál CCI-TL bá da-haat ne’e, katak provizoriamente emprezáriu Timoroan na’in-rua mak atu kompete iha eleisaun prezidente CCI-TL períodu tuir mai ne’e. Sira na’in-rua ne’e mak; Jorge Manuel de Araújo Serrano nu’udár na’in bá empreza Grupo Media Nacional (GMN) ho Novo Turismo ho Lourenço de Oliveira nu’udár na’in bá empreza airline Aero Díli no Timor Holding. 

Prezidente fundadór CCI-TL, Julio Alfaro ne’ebé Hatutan.com konfirma via telefone, Segunda (14/11/2022), hateten, kandidatu prezidente CCI-TL na’in-rua ne’e kompetente hotu, mas tuir nia hanoin, parte hotu-hotu tuur hamutuk ko’alia bá malu  atu di’ak  no hamosu konsensu ida hodi indika prezidente CCI-TL no indika estrutura ne’ebé reprezentativu hodi lori CCI-TL ne’e bá oin no kontribui ativa iha prosesu dezenvolvimentu nasionál.   

Julio Alfaro ne’ebé eleitu hanesan prezidente fundadór iha primeiru kongresu CCI-TL nian ne’ebé hala’o iha Otel Timor, Díli, iha loron 17 fulan-Abríl 2010, fó hanoin bá ekipa susesu kandidatu  prezidente CCI-TL na’in-rua nian; Jorge Serrano ho Lourenço de Oliveira, katak emprezáriu timoroan hotu tenke hamutuk no labele fahe malu tan ona hanesan tina-ualu (8) bá kotuk. Katak, emprezáriu timoroan hotu tenke hamutuk iha CCI-TL fó liman bá malu no tau kbiit hamutuk hodi promove CCI-TL no hatuur CCI-TL hanesan mahan bá setor privadu sira hotu hodi luta bá interese nasionál.  

“Ha’u nia hakarak ita hamutuk atu fó liman ba malu no fó forsa bá malu atu promove CCI-TL no kontribui ativa ba dezenvolvimentu nasionál. Tanba ne’e, kongresu ne’e tenke iha konsensu atu la bele fahe malu tan,” Julio Alfaro hateten.  

Bá estrutura CCI-TL períodu 2022-2026, Julio Alfaro fó hanoin no espera katak  bele servisu hamutuk ho entidade hotu-hotu liuliu setor privadu timoroan hotu atu hatuur duni CCI-TL hanesan parseiru estratéjiku Governu nian iha dezenvolvimentu nasionál  n o kontribui promove diálogu ho Governu atu indika medida saida mak CCI-TL bele halo no Governu bele tulun hodi kapasita setór privadu nasionál.

Hosi sorin seluk, Prezidente CCI-TL Oscar Lima hateten, nia la bele ona kandidata-an bá Prezidente CCI-TL períodu 2022-2026 tanba iha estatutu CCI-TL nian la fó dalan bá terseira període.

Oscar Lima hateten,  iha loron 17 -18 fulan-Novembru 2022, CCI-TL sei realiza kongresu nasional  iha Otel Novu Turismu  hodi hili Prezidente CCI-TL foun bá períodu 2022-2026.

“Hau asume kargu ne’e bá períodu rua  ona 2014-2018 ho 2018-2022.  Ha’u nia kolega Julio Alfaro períodu ida hosi 2010-2014.  Ita tenke fó oportunidade bá Timoroan seluk atu dezenvolve CCI-TL bá oin,” Oscar Lima hateten.

Jornalista : Rogério Pereira  Cárceres