Hatutan.com, (14 Dezembru 2022), Díli—Diresaun Jerál Servisu Rejistu Notariadu (DGSRN) hasai hikas sirkulár ida iha loron 14 fulan-Dezembru 2022, hodi fó hatene bá públiku katak atendimentu públiku la’o normal hanesan baibain bá servisu rejistu sivíl, rejistu kriminál, billete identidade, pasaporte ho servisu seluk-seluk tan.

Avizu hosi DGSRN.

Sekulár ne’ebé asina diretamente hosi Diretór Jerál DGSRN, Crisogno da Costa Neto nian ne’e hodi anula sekulár ka avizu ne’ebé publika hosi Diresaun Munisipál Konservatóriu Servisu Rejistu no Sekretariadu Munisípiu Dili (DMCSRN-Dili) ne’ebé antes ne’e fó sai avizu bá públiku katak, hahú iha loron 15 fulan-Dezembru 2022, DMCSRN-Díli sei la halo atendimentu públiku hanesan baibain bá trata sertidaun foun no sertidaun retifika/renovasaun no mós billete identidade foun ho renovasaun billete identidade tanba DMCSRN-Dili sei halo servisu administrativu hodi taka tinan 2022.

Sirkulár ne’ebé asina hosi Diretora DMCSRN-Díli, Octavia Celeste de Sousa Soares, iha loron 12 fulan-Dezembru 2022, konsidera lapsu administrativu no sala. Tanba ne’e, liuhosi DGSRN fó sai hikas avizu foun katak DGSRN, DNRN, DNICRC no mós iha Diresaun Munisipál Konservatóriu Servisu Rejistu ho Notariadu (DMCSRN) iha munisípiu 12 inklui RAEOA halo servisu atendimentu públiku bá sidadaun sira tuir oráriu no oras servisu  nian ne’ebé regulariza iha artigu 44 ho artigu 55 Lei-Númeru 5/2009, 15 Jullu (primeira alterasaun Lei-Númeru 8/2004, 16 Juñu, Aprova Estatutu Funsaun Públiku.  

Sirkulár DMCSRN-Dili invalidu

Sekulár DMCSRN-Dili nian ne’e sai viral iha media sosiál Facebook no hamosu kritika hosi sosiedade tanba konsidera avizu ka sirkulár ida-ne’e violasaun bá oráriu prestasaun servisu Estadu nian ne’ebé regula iha Lei Funsaun Públiku.

Jornalista : Vito Salvadór