Hatutan.com, (25 Janeiru 2023), Díli— Prezidente Repúblika, José Ramos-Horta promulga ona Dekretu Lei númeru 1/2023, 25 Janeiru kona-bá Ezekusaun Orsamentu Jerál Estadu (OJE) tinan 2023.

Diploma ne’ebé aprezenta hosi Ministru Finansas (MF) Rui Gomes ba iha Konsellu Ministrus iha 11 Janeiru, nia objetivu atu estabelese regras kona-bá ezekusaun orsamentál hodi fasilita ezekusaun OJE 2023.

Lee Mós: Xefe Estadu Promulga OJE 2023 Billiaun $2,16

Iha Diploma ne’e, Oitavu Governu Konstitusionál introdús ba dahuluk uzu Kartaun Débitu no Kartaun Kréditu ne’ebé Titulares no Membrus Órgaun Soberania, Titulares Órgaun Diresaun no Titulares Kargu Diresaun bele uza hodi halo pagamentu bens no servisus liuhusi plataforma online.

“Liuhosi Diploma ne’e Oitavu Governu Konstitusionál mós introdús ba dahuluk programa pílotu Dezentralizasaun Funsaun Pagamentu Tezouru (Back Office) 100% ba iha Liñas Ministeriais selesionadu hamutuk sanulu-resin-tolu (13) inklui Prezidénsia da Repúblika, Parlamentu Nasionál, Primeiru-Ministru, Ministériu Finansas, Ministériu Negósius Estranjeirus no Kooperasaun no seluk tán,” Hatutan.com sita komunikadu.

Entidades Estadu selesionadu hirak-ne’e hetan autonomia kompletu hodi ezekuta rasik sira-nia orsamentu hahú hosi inísiu to’o realizasaun pagamentu bens no servisus.

Melloramentu hirak ne’e Governu hahú halo neine’ik maibé beibeik, ho objetivu atu uza rekursu finanseiru ho di’ak, ho kualidade no efisiente ba bem-estar Povu nian.

Iha tinan 2017, Sestu Governu Konstitusionál hahú desentraliza Funsaun Pagamentu Tezouru 100% ba iha Ajénsias Autonomas no Autoridades Munisipais. Enkuantu ba Liñas Ministeriais 75%.

Polítika ne’e, aliña ho Polítika Reforma Fiskál no Jestaun Finanseira Públikas ne’ebé mak introdús ona desde tinan 2015 hosi Kintu Governu Konstitusionál no haree ba ninia importánsia, Oitavu Governu Konstitusionál komprometidu atu kontinua implementa.

Iha loron 05 fulan-janeiru, Ministru Rui Gomes mós halo ona abertura ofisiál ba sistema Government Resource Planning (GRP) ka FreeBalance hodi marka inísiu ezekusaun OJE 2023 no simbolikamente Entrega Pakote OJE 2023 ba reprezentante Gabinete Prezidénsia da Repúblika, Gabinete Prezidente Parlamentu Nasionál, Gabinete Primeiru-Ministru, Gabinete Prezidente Tribunál Rekursus nomós ba Liñas Ministeriais.

Jornalista: Rogério Pereira Cárceres