Hatutan.com, (26 Janeiru 2023), Díli—Comissão Anti Corrupção (CAC), iha Kinta, 26 janeiru 2023, notifika Ministru Agrikultura no Peskas (MAP), Pedro dos Reis nu’udár suspeitu, tanba deskonfia komete kazu krime balun iha Ministériu ne’ebé nia rasik lidera.

Ministru Agrikultura no Peskas (MAP), Pedro dos Reis presta deklarasaun iha Comissão Anti Corrupção nu’udár suspeitu ba kazu krime korrupsaun passiva, iha Faról, Kinta (2/01/2023).

MAP Pedro dos Reis tama iha sala investigasaun durante oras tolu nia laran, hahú hosi tuku 09:18 to’o 12:00 hodi hato’o ninia deklarasaun bá investigadór CAC nian.

Hafoin sai hosi sala investigasaun, Pedro dos Reis dehan, nia prezensa iha CAC tanba kumpri notifikasaun ne’ebé CAC fó bá nia, hodi presta informasaun relasiona ho kazu balun.  

Ministru Pedro dos Reis dehan, tuir loloos notifikasaun hosi CAC nia tenke hato’o informasaun sira iha loron 25 fulan-janeiru 2023, maibé tanba ajenda importante sorumutu Konsellu Ministru ordináriu, nune’e liuhosi koordenasaun ne’ebé mak iha, husu adi’a mai ohin.

“Tanba ne’e mak ohin ha’u mai halo kompleta, fó informasaun bá CAC. Ha’u ema tékniku, ha’u la hatene ninia signifikadu bá Lei ninian. Ha’u la hatene ida. Ha’u mai fó informasaun de’it. Maibé tuir karta notifikasaun ne’ebé ha’u simu ne’e hanesan suspeitu,” Pedro dos Reis hateten hafoin submeter bá investigasaun iha CAC, Faról.

Maske nune’e, Pedro dos Reis dehan prosesu investigasaun bá kazu ne’ebé deskonfia nia envolve bá ne’e la’o hela, no iha informasaun lubuk ida mak nia hato’o ona bá investigadór sira. Nune’e nia respaita nafatin instituisaun ne’e atu hala’o ninia serbisu.

“Proseu la’o hela, halo labele hakat jurídiku sira ninia serbisu. Oras-ida ha’u partilla uluk informasaun sira ne’e, ha’u sala fila-fali, ha’u halai uluk fali. Di’ak liu ita hotu-hotu hein, importante mak ha’u kolabora, ha’u la tau an hanesan Ministru, maibe ha’u tau an hanesan sidadaun ida ne’ebé mak di’ak,” Pedro do Reis hateten.

Hanesan sidadaun ne’ebé mak di’ak, Pedro dos Reis sempre prontu atu kooperasaun ho instituisaun ne’ebé de’it, liu-liu CAC hodi fó ninia informasaun ruma atu hatán bá notifikasaun hosi CAC.

“Klaru CAC bolu ha’u mai iha indikasoins ka informasoins ne’ebé liga ho ministériu. Entaun, saida mak ha’u partilla iha ne’ebá, ne’e serbisu jurídku ninian, ha’u labele halai uluk, tanba prosesu ne’e sei naruk,” nia subliña.

Tuir informasaun ne’ebé Hatutan.com asesa katak, CAC notifika Pedro dos Reis ho kualifikasaun hanesan suspeitu, kona-bá kazu ho NUC 0008/21.CACTL, relasiona ho krime Korrupsaun Passiva bá Ajente Administrasaun Públika, artigu 80 no 81, Lei númeru 7/2020 ne’ebé mak akontese iha tinan 2021.

Observasaun Hatutan.com iha terrenu nota katak, Pedro dos Reis to’o iha CAC Farál iha tuku 09:00, dadeer otl ho karreta priváda kór-mutin, xapa matrikula A.13.295.

Ministru hosi Partidu Kmanek Haburas Unidade Nasionál Timor Oan (KHUNTO) ne’e hetan seguransa hosi membru PNTL liuhosi Corpo Segurança Pessoal (CSP) na’in-tolu, inklui adovagadu privadu.

Jornalista: Rogério Pereira Cárceres