Hatutan.com, (27 Janeiru 2023), Díli—Xefe Estadu Maiór Jenerál FALINTIL Forsa Defeza Timor Leste (F-FDTL), Tenente Jenerál Domingos Raúl “Falur Rate Laek”, husu sidadaun sivíl ne’ebé oras-ne’e sei asegura hela arma ka kilat ruma iha sira ninia uma, ‘favór’ tenke entrega hotu bá Estadu.

Falur Rate Laek husu ne’e relasiona ho kazu apreensaun kilat ne’ebé Policia Ciêntífica de Investigação Criminal (PCIC) halo iha Segunda (16/01/2023), iha rezidénsia privádu eis Prokuradór Jerál Repúblika (PJR), Longuinhos Monteiro iha Munisípiu Likisá.

Lee Mós: Tribunál Liberta Longuinhos Monteiro Tanba Buska no Apreensaun Hosi PCIC Ilegál

“Kona-bá kilat ne’e, ha’u hakarak fó apelu tán dala-ida bá ema hotu-hotu, eis titulár sira, eis funsionáriu públiku sira, eis militár Indonézia, eis polísia sira, eis Falintil sira, ema hotu-hotu ne’ebé rai kilat iha uma karik, mai entrega. Kilat nunka halo di’ak ema, rona ka la’e!,”Falur Rate Laek hateten bainhira partisipa iha Ezersísiu Semana Kampu bá Soldadu Rekrutadu foun na’in-600, iha área Fatubela-Rembór, Suku Aiteas, Postu Administrativu Manatuto-Vila, Kinta (26/01/2023).

Líder másimu Instituisaun F-FDTL ne’e dehan, bainhira sidadaun sivíl sira liu-liu eis titulár sira ne’ebé mak hakarak asegura no uza hotu arma ka kilat, tenke husu atu la’o tuir legalidade ne’ebé mak iha.

“Lei ne’ebé hatete dehan sira merese kilat iha, entaun ne’e para komandu rua ne’e kontrola no hatene. Mas kuandu la hatene, ne’e mak ita dehan, instituisaun ne’ebé responsábiliza ne’e fase liman. Ne’ebé, ha’u apela tán dala-ida bá ema hotu ne’ebé kaer materiál kilat, ne’e labele. Tenke entrega,” Falur Rate Laek apela.

Tanba, Tuir Falur deha ema hirak ne’ebé merese atu kaer arma ka kilat maka sidadaun ne’ebé haknaar aan iha instituisaun seguransa no defeza hanesan Polisia Nasionál Timor-Leste (PNTL), ho F-FDTL, la’ós sidadaun sivíl.

Iha segunda (16/01/2023), ekipa konjunta kompostu hosi forsa Polisia Nasionál Timor-leste (PNTL), liuhosi Servisu Infornasaun Polisia (SIP), no FALINTIL Forsa Defeza Timor-Leste (F-FDTL), hosi Servisu Informasaun Militár (SIM/J2), Polisia Militár (PM) konjunta ho Polisia Sientífika no Investigasaun Kriminál (PCIC-Sigla Português), halo buska no apreensaun domisiliária bá eis ministru interiór, Longuinhos Monteiro nia rezidénsia iha Likisá, tanba deskonfia rai-subar arma funu nian.

Rezultadu hosi buska ne’e, konsege prende Pistola Lot-9789 Made by Germany+Carregador ida ho bala hitu (7), totál (1). Kilat Air Force, Made in US, Model R-1212 totál 1. Kilat Marauder 177-Cal/4.Smm 2500 Psi (1). Kllat Sam Yang ind.co. Made in Korea, Golden Sayer air rifle Mud 700.cal.4,55mm (1). Kilat Rama, Horton Special edition, Made in US, B59748 (1).

Munisoens Real Mi6 (309), Munisoens Kaliber-12 (2), Munis0ens Pistola Glock 19 (1,496), Munisoens Simulada Mi6 (160), Munisoens Klat Vinte Dois (22) (11), Munisoens Broning Ro’o (3), Rama Oan Red Zone 2219 (2), Bomba Kilat (3), Munisoens Maujer (6), Munisoens SKS (29), Munisoens J3 (168), Munisoens Boracha (19), Munisoens simulada Metra (99), Munisoens Kaliber 22 (11), Progetil M16 (1).

Karegador J3 (4), Karegador Pistola Lot- 9789 (2). Assesoriees GSP Map- 60csx Garmin (1), Cas Batria (1), Maka Militar (2), Lampu Solar (2), Jacket Militar (2), Sillêncioso Pressão ao Ar (6+pack 2).

Maibé, ikus mai, Tribunál Distritál Dili (TDD), hasai despaixu ida, ne’ebé mak deside hodi liberta totál arguidu LM hosi nia kazu, tanba prosesu sira kona-bá buska no apreensaun hosi PCIC, iha Segunda (16/01/2023) konsidera ilegál, tanba la tuir formalizmu legál.

Jornalista: Rogério Pereira Cárceres