Hatutan.com, (01 Fevereiru 2023), Díli—Governu deside hodi suspende ka hapara ona desizaun sira kona-bá Timor-Leste (TL) ninia kandidatura bá Konsellu Direitus Umanus iha Organizasaun Nasoins Unidas (ONU).

Desizaun bá suspensaun ne’e, liuhosi sorumutu ordináriu Konsellu Ministru nian, ne’ebé aprova ona projetu rezolusaun Governu, mak aprezenta hosi Vise Ministru Negósiu Estranjeiru no Kooperasaun (MNEK), Julião da Silva, hodi halo suspensaun bá desizaun kandidatura Timor-Leste nian iha Konsellu Direitus Umanus ONU, bá periudu 2024-2026, adota liuhosi Rezolusaun Governu nian, númeru 61/2021, loron 12 fulan-maiu.

Nune’e, TL aliña ninia pozisaun ho Association of Southeast Asian Nations (ASEAN) nian, ne’ebé hili Repúblika Indonézia nu’udár kandidatu úniku bá organizasaun Konsellu Direitus Umanus, periudu tinan 2024-2026, suspende ninia kandidatura to’o eleisaun Konsellu Direitus Umanus, bá periúdu tinan 2027-2029.

“Iha loron 12 fulan-maiu liubá, Timor-Leste avansa ho ita ninian kandidatura bá konsellu direitus umanus. Maibé, agora, Timor-Leste deside atu suspende lai, no atu re-kandidata fali iha tinan 2027 to’o 2029,” Ministru Prezidénsia Konsellu Ministru, Fidelis Manuel Leite Magalhães, hateten liuhosi konferénsia iha sala konferénsia Palásiu Governu, Díli, Kuarta (01/02/2023).

Portavós Governu ne’e fundamente katak, razaun hodi halo suspensaun ida-ne’e, tanba TL iha faze ne’ebé maka la’o ona bá oin, avansadu loos, bá iha adezaun Association of South of Asean Nation (ASEAN), no konforme ASEAN ninia prátika, só membru ida ne’e mak bele konkorre bá iha kna’ar sira hanesan ne’e.

“Indonézia mós asume Prezidente rotativa ASEAN nian, sira mós avansa ho sira ninia kandidatura. Entaun, Timor-Leste deside atu suspende lai, no atu adi’a fali bá iha tinan 2027, 2029, hodi Indonézia avansa agora, iha 2024 to’o 2026,” ministru Fidelis Magalhães hateten.

Jornalista: Rogério Pereira Cárceres