Hatutan.com, (13 Fevereiru 20223), Díli—Klubu Primeira Divizaun Akademica FC iha ona preparasaun másimu ba liga Timorense époka 2022-2023.

Ekipa Academica FC hala’o preparasaun tátika iha Kampu Futeból Comoro Díli.

Parte manajementu hamutuk ho treinadór iha ona konkordánsia hodi halo mós kontratu ba jogadór sira nasionál no mós estranjeiru atu bele reforsa klubu durante jogu sira époka ne’e.

Lee Mós: Abertura Liga Timorense Époka 2022-2023, Aitana Fc Vs Portu Taibessi Fc

Atu haforsa kompozisaun Jogadór ne’ebé iha, klubu Academica FC halo mós kontratu ho jogadór Estranjeiru ida hosi nasaun Indonézia ne’ebé antes ne’e iha ona esperiénsia joga iha klubu Primeira divizaun Timor-Leste époka hirak ba kotuk.

Jogadór estranjeiru ne’ebé Academica FC kontrata ho naran kompletu Dani Aryanto, antes ne’e joga ba Klubu PSMS Medan no iha Liga Timorense nia reforsa ona klubu AD SLB Laulara FC no Cacusan FC iha époka sira antes ne’e.

Treinadór klubu Academica FC, Luzinho dos Santos hateten, Academica FC hahú hala’o perparasaun kuaze fulan ida ona, maibé jogadór mak menus.

Maske jogadór menus, Academica FC kontinua perpara fíziku no komesa tama sistema formasaun ne’ebé mak perpara liu-liu tátiku ne’ebé perparadu bá jogadór sira atu aplika iha jogu.

Academica FC iha jogadór estranjeiru ida ho nasionalidade Indonézia, lsos Jogadór foun iha Liga Timorense tanba antes ne’e joga ona ba klubu AD SLB Laulara FC no Cacusan FC, haree ba esperiénsia ne’ebé jogadór ne’e iha, Academica FC deside bolu no halo kontratu atu haforsa Klubu ba époka 2022-2023.

“Ami nia jogadór agora iha lista ema na’in 17. Ami sei buka tán jogadór, tanba haree katak seidauk másimu maibé ami tenke nafatin iha konfiansa tanba liu hosi treinu mak foin ba kompete iha Liga,” Luzinho dos Santos hateten iha kampu futeból Comoro, Domingu (12/02/2023).

Kona-bá preparasaun, Academica FC nian másimu ona tuir kondisaun ne’ebé klubu iha no garante katak Academica FC sei hatudu jogu ida diak no kompetitivu iha liga époka 2022-2023.

Jogador estranjeiru Dani Aryanto hatete, nia parte ho Academica FC selebra kontratu ba fulan tolu tuir oráriu liga Timorense époka 2022-2023.

Bainhira iha posibilidade aumenta ida-ne’e depende ba desizaun hosi klubu no nia parte nafatin iha komitmentu karik klubu presiza.

“Há’u nia kontratu ho Académica FC fulan tolu, tanba liga iha ne’e ba époka 2022-2023 la’o durante fulan tolu, no karik orsida aumenta ita sei aumenta,”  Dani Aryanto hateten.

Dani Aryanto iha esperansa atu lori Academica FC mantein pozisaun primeira divizaun ba époka tuir mai.

Jornalista: Vito Salvadór