Hatutan.com, (22 Fevereiru 2023), Díli—Kuarezma, tinan ne’e, sai hanesan selebrasaun ida la’ós baibain bá pasiente ho família pasiente sira nian ne’ebé hala’o hela tratamentu intensivu iha Ospitál Nasionál Guido Valadares (HNGV), Díli.  

Lee Mós : Kuarezma, Tempu bá Sarani Sira Halo Orasaun, Karidade no Jejúm

Se tinan sira liubá, sira hahú kuarezma iha sira ida-idak nia uma no sira-nia igreja, ohin,  tanba kondisaun saúde, sira tenke hahú sira-nia tempu kuarezma iha HNGV .

Pasiente sira ne’ebé hala’o tratamentu saúde iha HNGV hamutuk ho sira-nia família partisipa iha misa Kuarta-Feira Sinzas iha Kapela São João-HNGV, Díli, Kuarta (22/2/2023). Foto/ Dirce Sandra da Costa Gomes

Sira lubun, hosi terseira idade, adultu to’o labarik sira  ne’ebé baixa iha sala baixa nian iha HNGV tenke hahú sira nia tempu kuarezma iha ospitál laran hodi hetan tratamentu hosi pesoál saúde sira.

Hanesan tinan-tinan, padre selebrante sempre prezide misa Kuarta-Feira Sinzas bá pasiente ho nia família sira iha Kapela São João-HNGV nian. Kuarta (22/2/2023), hale’u tuku 08.00 Otl, família no pasiente ne’ebé nia saúde (bele la’o no hamriik)  halibur malu iha kapela laran hodi  partisipa iha misa abertura tempu kuarezma nian  ne’ebé prezide hosi amu selebrante Francisco Barreto.

Bainhira tama bá iha serimónia simu sinzas hosi amu selebrante, pasiente ho sira-nia família forma hanesan sarani sira bá simu komuñaun. Padre Francisco Barreto lori ahu-kudesan marka sinál krús iha sira ida-idak nia rentós   tuir tradisaun Kristaun Katólika nian bainhira hahú loron dahuluk tempu kuarezma nian ne’ebé baibain bolu Kuarta-Feira Sinzas.

Ahu-kudesan sinál rai-rahun ne’ebé tuir ema katóliku sira-nia fiar katak Maromak halo ema hosi rai no sei fila fali bá rai liuhosi mistériu mate.   

Amu Francisco Berreto iha nia omilia hateten, kuarezma nu’udár tempu ida atu sarani sira halo orasaun, karidade no peniténsia  ka jejúm durante loron-40 molok festa páskua.

Nia hatutan, ema sira ne’ebé moras iha HNGV jejúm la para maibé momentu  ne’e oinsa tulun malu no tulun sira atu  sira-nia peniténsia ida ne’ebé  Maromak fó deit sira lori kaman ho fiar ho laran kaman. 

“Tempu maksoin tempu di’ak, tempu maksoin o fó o nia an tomak  dame, tane malu bá Maromak. Iha Ospitál ekipa mediku  ne’e ema hotu-hotu  ne’ebe servisu,  ne’ebé mak fó atendimentu bá moras sira  no ekipa  apoiu diresaun tomak iha ne’e  ita hotu-hotu bainhira fó sai Leitura  ida-ne’e mak  ita halao didiak ita nia kana’ar  iha ne’e, oinsá mak ita servisu haree moras sira ho pasensia,” Amu Francisco Barreto tenik.

Tuir nia, moras sira mós iha idaidak nia fatin simu sira-nia terus ne’e hodi hasae bá Maromak, no hirak ne’ebé (pesoál saúde sira) tulun moras sira halao didiak  nia kna’ar no neon no laran di’ak.  

São Paul nia surat bá sarani sira iha Korentu haktuir katak kuarezma, tempu di’ak atu hadame malu ho Maromak no tempu di’ak ne’e rona  Maromak nia liafuan.

“Maromak rona o hasae orasaun bá Maromak. Nia sei rona no  iha tempu maksoin Maromak sei tulun o,” amu Francisco Barreto haktuir.

Jornalista Estajiáriu : Dirce Sandra da Costa Gomes