Hatutan.com, (23 Fevereiru 2023), Díli-Antigu Ministru Obras Publika, Transporte  no Komunikasaun (MOPTK), Ináçio Moreira, Kinta (23/2/20230, hale’u tuku 08:55 Otl, marka prezensa iha edifísiu Comissão Anti Corrupção (CAC) iha Farol, Díli, hodi kumpre karta de komparénsia bá presta deklarasaun nu’udár testemuña  bá prosesu konstrusaun fíziku  Ró Haksolok.

Lee Mós : Auditoria TR: Timor-Leste Gasta Ona Millaun $24 Bá Konstrusaun Ró Haksolok

“Lae, ha’u la’ós hetan notifikasaun. Ha’u nia karta de komparénsia. Ne’e presia tenke hatene. Notifikasaun ne’e iha kazu, no ha’u labele halo komentáriu liu fali saida mak ita-nia investigadóres sira hosi CAC ne’e husu. Apenas atu husu tuir lala’ok konstrusaun Ró Haksolok. Ne’e de’it,” Ináçio Morreita hateten bá jornalista sira remata  fó informasaun sira bá Investigadór  CAC nian.

Antigu Ministru Obras Publika, Transporte no Telekomunikasaun, Ináçio Moreira. Foto/Foti hosi Google

Hanesan membru iha Sestu-Governu Konstitusionál tenpu ne’ebá, Inácio Morreira dehan, nia laiha envolvimentu ruma bá prosesu sira konstrusaun Ró Haksolok nian tanba tempu ne’ebá, nia atribui tiha ona Ró Haksolok ne’e bá Autoridade sira iha Rejiaun Administrativa Espesiál Oé-Cusse Ambeno (RAEOA).

“Ha’u hanoin, ita-boot sira hatene, Ró Haksolok ne’e, uluk atribui tiha bá RAEOA, ne’ebé, prosesu tomak, hahú hosi konstrusaun no bá to’o atu halo jestaun ida ne’e, RAEOA. Ne’ebé, ha’u laiha envolvimentu ida. Komu iha duni informasaun ruma, presiza duni tenke ajuda para fó informasaun, atu nune’e investigasaun ne’e tenke la’o bá oin,” Ináçio Moreira afirma.

Hatán kona-bá karik RóHaksolok sai ona hanesan kazu ida boot, esi ministru obras públika ne’e dehan, atu sai kazu ka la kazu ne’e, normál, prosesu bá rekollamentu informasaun bá prosesu tomak ne’ebé la’o tenk la’o hanesan ne’e.

“Ha’u mai fó informasaun, kompleta informasaun bá konstrusaun Ró Haksolok de’it. Mai fó hanesan testamuñu de’it. Ne’e normál ka lae,” Ináçio Moreira tenik.

Kona-bá koñesimentu sira bá iha sira konstrusaun  bá Ró Haksolok ne’e rasik, ne’ebé ikus mai sai tiha ona kazu boot, Ináçio Morreira haktuir, ema hotu hatene, uluk nia sei deputadu iha Parlamentu Nasionál, eis Primeiru Ministru (PM) iha momentu ne’ebá, Kay Rala Xanana Gusmão, konvida sira hosi kuadru FRETILIN na’in-haat mak bá ajuda.

“Ne’ebé, halo serbisu hanesan baibain, no iha ministériu das obras públikas transportes no komunikasoens. Ne’e, ami serbisu iha ne’ebá, tuir kna’ar ne’ebé ami simu, no relativamente bá Ró Haksolok ne’e, tanba momentu, antes ne’e, iha duni prosesu iha ne’ebá. Mais depois atribui tiha bá iha RAEOA. Prezidente RAEOA ho ninia estrutura tomak maka toma-konta bá prosesu tomak. Ne’e de’it,” Ináçio Moreira konklui.

Observasaun Hatutan.com iha terrenu nota, iha kinta, 23 fevereiru 2023, Ináçio Moreira to’o iha edifísiu CAC Faról-Dili, ho ninia kareta privádu, Xapa Matrikula 26.732.

Iha Sesta, 11 fulan-Novembru  2022,  hale’u tuku 10:06 Otl, CAC bolu ona mós Eis Prezidente Autoridade RAEOA, José Luis Guterres, hodi presta nia deklarasaun hanesan mós sasin bá kazu projetu boot sira iha RAEOA.

Lee Mós : Alkatiri Konsidera Investigasaun Bá Ró Haksolok Aktu Persegisaun

Jornalista: Rogério Pereira Cárceres