Hatutan.com, (06 Marsu 2023), Díli- Sekretáriu Estadu Protesaun Sivíl (SEPS) liuhosi Autoridade Protesaun Sivíl (APC, sigla portugés) rejista ema na’in-tolu mate no uma-167  hetan estragu hafoin akontese dezastre natural durante semana ida resin, hahú hosi  loron 27 fulan-Fevereiru too loron 6 fulan-Marsu 2023.

Lee Mós : Uma 73 Hetan Estragu Tanba Dezastre Naturál

Dezastre naturá sira ne’ebé APC rejista mak dezastre katástrofe  no asidente grave sira ne’ebé akontese iha territóriu Timor-Leste ho tipu tolu mak hanesan anin-boot ka anin sobu uma, inundasaun ka bee-sa’e, no ida seluk mak rai halai.

Dezastre Naturál ne’ebé akontese iha 3 Fevereiru 2023, estraga uma-rua iha Postu Administrativu Hatolia B, Suku Lisapat Aldeia Naumanaro no Suku Poetete, Postu Administrativu Ermera. Foto/Facebook.

Diretór relasaun Externa no Komunikasaun APC,  Anacleto Caetano ba jornalista sira iha edifísiu APC, Caicoli, Segunda (06/03/2023), hateten APC kontinua atualiza situasaun dezastre naturál liga bá iha dezastre katástrofe no asidente grave sira ne’ebé sempre akontese hanesan anin-boot, udan no bee-sa’e, inklui rai halai ne’ebé afeta bá komunidade sira.

Dezastre sira ne’ebé akontese iha territóriu nasionál iha semana dahuluk fulan-Marsu, tinan ne’e, ho deskrisaun sira hanesan tuir mai ne’e; Munisípiu Aileu, Postu Administrativu Remexiu, Suku Asumau, Aldeia Aimerahun, Kuarta (01/03/2023), anin sobu komunidade nia uma rua no rai halai estra mós komunidade nia uma ida.

Iha Postu Administrativu Laulara, Suku Boklele, Aldeia Ermequi no Konsin, Munisípiu Aileu, Sesta (24/02/2023), akontese inundasaun no estraga komunidade sira nia uma hamutuk rua (2).

Iha Munisípiu Ainaro, Suku Ainaro, Aldeia Lugatu, Domingu (26/02/2023), akontese anin-boot no sobu komunidade nia uma ida.

Iha Munisípiu Baucau, Postu Administrativu Baguia, Suku Defawase, Aldeia Laribere, Domingu (26/02/2023), akontese anin-boot no sobu komunidade nia uma ida.

Iha Munisípiu Covalima, Postu Administrativu Suai Villa, Suku Suai Loro, Aldeia Akar laran, Kuarta (01/03/2023), akontese anin-boot no sobu komunidade nia uma ida (1).

Iha munisípiu Ermera, Postu Administrativu Letefoho, Suku Era Ulu, Aldeia Madede, Sábadu (04/02/2023), akontese sidadaun ida mate tamba mout iha lagoa Era Ulun ho naran Remígio de Deus Maia ho idade tinan 13.

Iha Munisípiu Liquiça, Postu Administrativu Maubara, Suku Maubaralisa, Aldeia Daralema, Sábadu (25/02/2023), akontese anin-boot sobu komunidade nia uma rua (2). 

Iha Kinta (02/03/2023), akontese anin-boot sobu mos komunidade sira nia uma-neen (6) iha Postu Administrativu Maubara, Suku Maubaralisa,  aldeia Erito, suku Batuboro no postu administrativu Liquiça Villa no Bazartete, Suku Leorema, Aldeia Ergoa, anin boot ai-monu hanehan komunidade nia uma ida (1).

Iha Munisípiu Díli, Postu Administrativu Vera Cruz, Suku Bemori, Aldeia Ailele Hun, Domingu (26/02/2023), akontese ahi han komunidade nia uma ida.

Iha Munisípiu Bobonaro, Postu Administrativu Kailaku, Suku Purugua, Aldeia Heda, Sesta (24/02/2023), akontese anin-boot estraga komunidade sira-nia uma tolu no iha loron hanesan iha postu administrativu Bobonaro, Suku Tapo, Aldeia Tapotas akontese rai halai estraga uma ida.

Iha Suku Lebel, Aldeia Mabelis,  Bobonaro, akontese mota-boot lori vítima ho naran Jeckison Moniz ho idade tinan 10, no mate isin hetan iha  Kinta (02/03/2023).

Iha Suku Lourba, Aldeia Buner,  Bobonaro, Segunda (27/02/2023), akontese rai halai estraga komunidade nia uma-ida (1) no loron hanesan iha Suku Oeleon, Aldeia Mologuen, Suku Malilai, Aldei Taimea, Suku Ilat-Laun, Aldeia  Ilat-Laun no Aldeia tunero, Suku Leber, Aldeia Leber atas, akontese anin-boot no estraga komunidade sira nia uma hamutuk hitu (7).

Iha Postu Administrativu Balibo, suku Batugade, Aldeia Lota, Tersa (28/02/2023), akontese bee-sa’e no estraga komunidade sira nia uma hamutuk 29.

Iha Munisípiu Lautem, Postu Administrativu Lospalos, Suku Fuiluro, Aldeia Losala, Domingu (26/02/2023), akontese anin-boot estraga komunidade nia uma ida.  Iha Suku Home, Aldeia Lilapu, anin-boot estraga komunidade nia uma ida. Iha Suku Com, Aldeia Pitiletin, anin-boot sobu mós komunidade nia uma ida.

Iha Suku Viqueque, Postu Administrativu Viqueque Villa, Suku Uma Wain Leten, Aldeia Bahawain, Sesta (03/03/2023), akontese Lafaek tata sidadaun ida ho naran Francisco Mendes ho idade tinan 32.

Tuir dadus ne’ebé APC rejista hatudu katak iha semana dahuluk fulan-Marsu, Rejiaun Administrativa Espesiál Oe-cusse-Ambeno (RAEOA), rejista vítima ida lakon vida tamba mota lori no  uma kain kuaze 90 resin mak afeta direita ba inundasaun

Diretór Relasaun Externa no Komunikasaun ne’e subliña katak bazeia bá dadus sira ne’ebé iha, Governu fó ona apoiu emerjénsia bá iha família vítima sira hodi hein ekipa konjunta sei tun ba halo levantamentu dadus no ré-verifikasaun atu bele kategoriza uma hirak ne’ebé hetan estragu tamba dezastre naturá nune’e bele hetan apoiu hosi Governu.

Too oras ne’e APC kuaze fó ona apoiu emerjénsia bá vítima sira ne’ebé afeta bá dezastre naturál kauza husi anin sobu uma, bee-sa’e ka mota sobu no rai halai.

Iha munisípiu balun seidauk fó apoiu maibé iha tempu badak ekipa APC sei halo distribuisaun apoiu emerjénsia tanba kestaun limitasaun iha rekursu hanesan transporte nune’e apoiu bá vítima sira too’ tarde.

Jornalista: Vito Salvadór