Hatutan.com, (06 Marsu 2023), Díli—Membru foun FALINTIL Forsa Defeza Timor-Leste (F-FDTL), hamutuk na’in-300 partisipa iha kursu militár hanaran Operasaun Apoiu Pás (OAP), iha Komponente Terrestre, iha área Lanud, Aeroportu Munisípiu Baucau.

Membru foun FALINTIL Forsa Defeza Timor-Leste (F-FDTL), hamutuk na’in-300 partisipa iha kursu militár hanaran Operasaun Apoiu Pás (OAP), iha Komponente Terrestre, iha área Lanud, Aeroportu Munisípiu Baucau. Foto/F-FDTL.

Komandu F-FDTL liuhosi Komponente Terrestre (CT-Sigla Portugês) Baucau mak halo abertura bá kursu OAP ne’e no Espesialidade Atiradór bá membru sira hosi Batalhão Norte no kursu espesialidade atiradór bá soldadu foun 300 ne’ebé foin integra iha CT.

Lee Mós: F-FDTL ho Forsa Amérika Kontinua Fahe Koñesimentu bá Malu Liuhosi Ezersísiu CARAT

Seremónia abertura kursu OAP ne’ebé hala’o ho parada militár ne’e, hetan intervensaun hosi primeiru komandante Componente Terrestre Coronel da Infantaria, José da Costa Soares “Trix”, husu membru sira hatudu nafatin vontade no dixiplina hodi apreende ho di’ak.

“Ba soldadu foun ne’ebé integra mai Componente Terrestre iha tinan 2023 nian presiza liu mak imi nia dixiplina no sakrifisiu iha fatin ne’ebé de’it. Abertura ba Operasaun apoiu pás nian balun treinu ona iha Metinaro no balun ohin hahú treinu iha ne’e. Nune’e, bá imi bainhira treinu hotu bá halo misaun iha ne’ebé de’it tenki tuir órden hosi komandu superiór sira,” Hatutan.com sita deklarasaun José da Costa Soares “Trix”,  iha komunikadu, Segunda (06/03/2023).

Tuir oráriu, kursu espesialidade bá atiradór ne’e hala’o durante semana lima (5), nomós Operasaun Apoiu A Paz ho durasaun fulan-neen (6).

Jornalista: Rogério Pereira Cárceres