Hatutan.com, (15 Marsu 2023), Díli- Prezidente Repúblika (PR), José Ramos-Horta, konfirmandu  veta alterasaun dalimak bá Lei númeru 6/2006 kona-bá Lei eleitorál.

Lee Mós : Ramos-Horta “Bolu” CNE ho STAE Konfirma Preparasaun Eleisaun Parlamentár 2023

Ramos-Horta hala’o enkontru ho Diretór Jerál STAE Acilino Manuel Branco no Prezidente CNE José Agustinho Belo inklui funsionáriu sira, iha salaun konferénsia STAE, Caicoli, Sesta (24/02/2023). Foto/Média GPR.

Ramos-Horta deside veta tanba nia haree katak alterasaun lei ne’e  komplikadu no la reflete ho preparasaun Sekretariadu Tékniku Administrasaun Estatal (STAE) no Comissão Nasionál das Eleições (CNE).

Prezidente Repúblika, José Ramos-Horta bá jornalista sira iha Resintu Universidade Katólika Timorense (UCT), Balide, Kuarta (15/03/2023) hateten,  preokupasaun ba alterasaun lei eleitorál la’ós Prezidente Repúblika de’it mak preokupa maibé mai mós husi parte relevante sira.

Nia afirma preokupasaun ba Alterasaun lei eleitorál ne’e ida mak votasaun sentru paralelu ne’ebé foin hahú iha eleisaun Prezidensiál la funsiona ho lolos no la garantia sidadaun sira bele vota no ema rihun ba rihun mak la vota.

“Hau rasik hanesan kandidatura hatene lakon votus lubuk ida tamba sentru paralelu sira ne’ebé estabelese laiha kontrolu ida diak, sidadaun lubuk ida sai hosi Dili atu bá vota iha Suai, to’o iha ne’eba sira dehan, imi tenke ba vota iha Díli, iha sentru paralelu, maibé iha sentru paralelu sidadaun sira bá naran laiha no mezmu vota karik iha sentru paralelu laiha fiskalizasaun hosi fiskal sira no transmite direitamente bá kedas STAE ho CNE, ne’e preokupasaun partidu sira lubuk ida, liu-liu partidu ki’ik sira,” Prezidente Repúblika José Ramos-Horta argumenta.

Xefe Estadu hatutan, iha alterasaun lei eleitorál foun ne’e ida fali kona-bá estatutu Atauro hanesan munisípiu ka la munisípiu, portantu munisípiu tambasa laiha sistema ne’ebé kontadu hanesan munisípiu sira hotu-hotu, tanba haree lei eleitorál lahan malu.

Nia sublina iha votasaun postal, uluk iha tinan sira liubá defende ida ne’e mas problema ho votasaun postal mak ne’e, se Governu halo kedas desizaun iha tinan ida liubá entaun bele monta sistema halo sensibilizasaun iha embaixada sira hotu-hotu iha rai sira ne’ebé Timoroan sira iha para bele funsiona didi’ak. Maibé, lei ne’e foin tama iha Parlamentu Nasionál iha fulan-Janeiru 2023, Governu mak lori lei ne’e tarde no lakompletu, ne’e dunik Prezidente Repúblika  rasik no tékniku sira ne’ebé konsulta dehan di’ak liu bá oin mak implementa.

“Se iha 2023 bá oin mak eleisaun foun ruma mai ho tempu naton mak bele implementa lei foun ne’e no lalika ansi,” Ramos-Horta afirma.

Xefe Estadu subliña, nia veta alterasaun bá lei eleitorál para hakmaan mós STAE no CNE sira nia servisu, di’ak liu lalika fó todan demais no kontinua ho votasaun hanesan uluk, maibé preparasaun didiak para bá eleisaun no mantein uza lei eleitorál ida anteriór tamba STAE no CNE uza tiha ona no hanoin katak diak hela.

Jornalista: Vito Salvadór