Hatutan.com, (04 Abríl 2023), Díli-Funsionáriu permanente hosi ekipa Bombeiru Timor-Leste na’in-96, Tersa (4/4/2023), simu posse hafoin admetidu iha konkursu públiku  ne’ebé hala’o iha fulan-Jullu 2022.

Lee Mós : Ahi Han Uma 53 Iha Merkadu Taibesi, Vítima 356 Okupa Eis Kuartél Militár Portugés

Emposadu sira-ne’e kompostu hosi mane’ na’in-86 no feto na’in-10. Sira simu tomada posse ofisiál hosi Komisaun Funsaun Públiku (CFP, sigla portugés) iha Akademia Polísia Nasionál Timor Leste (PNTL).   

Funsionariu foun Servisu Bombeiru nian. Foto/Elio dos Santos da Costa

Tuir relatóriu hosi ekipa komisaun rekrutamentu bá vaga selesaun tuir méritu bá Tékniku Administrativu, Grau Operasional no Motorista, konkursu públiku hosi Ministériu Interior, Sekertária Estadu Protesaun Sivil, aprezenta hosi Autoridade Protesaun Sívil (APC sigla portgés) bá Diresaun Nasionál Bombeiru, mak hanesan vaga operasionál Munisípiu Ermera 26, Vaga Motorista 6, Vaga Operasionál bá Munisípiu Liquiça 26, Vaga Motorista 6, Vaga Operasionál bá Munisípiu Manatuto 26, Vaga Motorista 6 no total vaga 96.

Abertura konkursu, hahú simu dokumetu iha loron 04 to’o 15 fulan-Jullu 2022. Totál konkorente na’in- 3,978, kompostu hosi feto 800 no mane 3178. Maibé, rezultadu hosi selesaun vaga ne’e, konklui katak, ema nain-96 mak selesionadu hodi sai hanesan membru foun bá Bombeiru nian, hodi halo destakamentu bá Munisipiu Ermera, Liquiça ho Manatuto.

Komisáriu bá Asuntu Dixiplinár, Faústo da Silva Freitas “Liurai Tasi” husu bá membru Bombeiru foun na’in-96 atu serví estadu ho loloos tuir lei.

“Servidór  Estadu ne’e, serví loloos bá Estadu. Tuir oráriu ne’ebé konsagra ona iha lei, oras to’o, fila-fali bá uma, tempu to’o, tenke iha fali servisu fatin. Sei labele halo buat seluk iha servisu fatin,” Komisáriu CFP bá Asuntu dixiplinár, Faústo da Silva Freitas, hateten.

Komisáriu Faústo Freitas, husu mós membru foun sira bombeiru nian na’in-96 atu labele koalia polítika ka halo propaganda polítika iha servisu fatin. Katak,  bele koalia de’it polítika ne’ebé mak hanesan ema servidór estadu ida nian, la’ós halo politika bá partidu nian.

Funsionáriu foun Servisu Bombeiro nian, Tersa (04/04/2023), simu posse hosi CFP. Foto/Elio dos Santos da Costa

Sekretáriu Estadu Protesaun Sívil (SEPS), Joaquim Gusmão, orgullu  tanba ho aumentu bá membru foun na’in-96 ne’ebé tuir planu destaka bá Munisípiu Ermera, Liquiça  ho Manatuto  bele ona kompleta korpu bombeiru sira iha munisípiu 12 inklui Rejiaun Administrativa Espesial Oé-Cusse Ambeno (RAEOA).

“Ita kompleta bá iha munisipiu tolu ne’e, ita rekruta membru 32 kada munisípiu. Sé atu dehan to’o ona, ita seidauk to’o. Mínimu ne’e, membru sira 32, maibé ho área servisu ne’ebé mak boot, ita tenke haree para bele aumenta tán ita-nia forsa Bombeirus ne’e,” SEPS Joaquim Gusmão hateten.

Área servisu ne’ebé mak boot liu mak, Manatuto, tanba kobre hosi tasi-mane to’o tasi-feto. Tanba ne’e maka, SEPS rasik hanoin ona katak, destakamentu bá membru bombeiru sira ne’e, labele tau de’it iha Manatuto Villa, maibé, destaka mós iha parte Norte nian, hanesan iha Suku Mana-Haat, Postu Administrativu Natarbora.

Hatán kona-bá ekipamentu ka fasilidade bá membru sira hodi hala’o kna’ar loroloron nian, SEPS Joaquim dehan,  iha tinan rua bá kotuk, SEPS sosa tiha ona karreta hodi ho marka Hilux, apoia bá iha komandante bombeiru sira, baibain sira bolu autu-komandu.

Iha tinan 2022 SEPS prevee ona mós osan iha Orsamentu Jerál Estadu (OJE) nian, atu bele kompleta ekipamentu foun bá iha munisípiu hotu.

SEPS Joaquim hatutan, maske membru foun sira ne’e, konklui ona formasaun bázika, maibé sei iha tán formasaun kona-bá oinsá mak atu utiliza ekipamentu sira ne’e.

SEPS sei instala mós Postu Bombeiru nian ida iha fronteira Mota-ain, inklui apoiu mós viatura balun, liu-liu kareta sira bá operasional ninian, no mós ho viaturas espesiais sira.

Kona-bá Munisipiu Ataúro, SEPS instala tiha ona ninia komandante no segundu komandante operasaun munisípiu nian hodi apoiu servisu iha área ne’ebá. Maibé, kona-bá atu halo tán rekrutamentu bá membru foun, SEPS sei orsamenta iha OJE 2024 nian.

Tuir alvu SEPS nian sei rekruta kada munisípiu iha membru bombeiru hamutuk na’in 32. Ida ne’e, mínimu, depois mak sei halo fali avaliasaun tuir kuantidade servisu nian, tanba iha munisípiu balu nia área jeográfika ne’e boot.

Jornalista: Rogério Pereira Cárceres