Hatutan.com, (04 Abríl 2023), Díli—Programa Nasoens Unidas ba Dezenvolvimentu (PNUD) hato’o apresiasaun bá Comissão Anti-Corrupção (CAC) tanba halo ona servisu di’ak hamutuk iha tinan naruk nia laran, iha esforsu hametin transparénsia no akuntabilidade governasaun iha Timor-Leste (TL).

Reprezentante PNUD lidera hosi Patrick Keuleers, International Consultant no Bruno Lencastre, Chief Technical Adviser hala’o sorumutu kortezia ho Komissáriu CAC Sérgio Hornai akompaña hosi Xefe Unidade Kooperasaun, João do Rosario Correia iha edifísiu Sentrál Faról Díli, Tersa (04/04/2023). Foto/Média CAC.

Apresiasaun ne’e PNUD hato’o liu hosi reprezentante ne’ebé lidera hosi Patrick Keuleers, International Consultant no Bruno Lencastre, Chief Technical Adviser bainhira hala’o sorumutu kortezia ho Komissáriu CAC Sérgio Hornai akompaña hosi Xefe Unidade Kooperasaun, João do Rosario Correia iha edifísiu Sentrál Faról Díli, Tersa (04/04/2023).

Lee Mós: CAC-PDHJ Hahú Unifika Forsa Hodi Hala’o Kontrolu Rigór bá Boa Governasaun

“Sorumutu ne’e PNUD hato’o sira ninia apresiasaun sinseru mai iha CAC tanba halo ona servisu di’ak hamutuk iha tinan naruk nian laran iha esforsu hametin transparénsia no akuntabilidade governasaun iha Timor-Leste,” Hatutan.com sita komunikadu.

Alende ne’e ko’alia kona-bá PNUD nia programa ba tinan 2021-2025 ho naran “UNDP New Governance Programa” ne’ebé CAC sei sai nu’udár instituisaun benefisiáriu.

Parte rua sita kona-bá kontinuasaun asisténsia liu hosi kooperasaun institusionál ne’ebé PNUD halo ona mai tulun CAC Timor-Leste durante ezisténsia iha tinan 13 nian laran.

Programa PNUD nian ba oin hafoin pandemia COVID-19 nian ba ajénsia anti-korrupsaun iha mundu tomak mak programa bilaterál no multilaterál iha área prevensaun korrupsaun.

PNUD identifika ona área kooperasaun ne’ebé sei benefisia governu Timor-Leste ne’ebé iha posibilidade kooperasaun tuir manajementu PNUD nian.

“Espera identifikasaun hirak ne’ebé PNUD halo ona bele iha kooperasaun di’ak atu ajénsia anti korrupsaun Timor-Leste nian bele implementa iha tinan lima (5) sei mai,” komunikadu ne’e hateten.

Reprezentante PNUD nian ne’e mós husu ba Komissáriu Sérgio kona-bá kolaborasaun entre CAC ho organizasaun Naun Governamentais (NGO) Timor-Leste.

Komissáriu Sérgio esplika katak, CAC iha kolaborasaun di’ak ho NGO nasionál TL liu hosi rede ne’ebé estabelese ona no CAC iha ninia mandatu kolaborasaun di’ak mós ho seitór privadu, públiku nu’udár parseiru importante iha luta kontra korrupsaun.

NGO sira ne’ebé kolabora di’ak no besik liu ho CAC iha luta kolektivu prevene no kombate korrupsaun mak CEPAD, JSMP nu’udár membru importante FONGTIL  ne’ebé durante ne’e servisu hamutuk ho CAC.

Kooperasaun instituisional liu hosi rede CAC nian ne’ebé estabelese kleur ona ho rede universitáriu, konfisoens relijiosas, lider komunitáriu, estudantes, juventude no instituisaun públiku iha liñas ministeriais, PDHJ, IGE, CFP, PNTL no instituisaun privada seluk iha luta sagradu ida-ne’e.

PNUD foka liu ba iha ajuda matéria prevensaun korrupsaun no UNODC ajuda ajénsia anti korrupsaun nian iha área investigasaun kriminál nian ho objetivu pozitivu perspetivu maka prevene no kombate korrupsaun nu’udár asuntu interesante importante iha boa-governasaun nasaun hotu nian.

Servsu importante ne’ebé CAC halo liu hosi Unidade Monitorizasaun kona-bá ezekusaun projetu maijór hanesan subsidiu $200 ba kada familia, Cesta Básica no projeitu importante iha liñas ministeriál sira.

Programa prevensaun ida-ne’e halo parte importante iha prevensaun korrupsaun nune’e jerente seniór sira iha ministériu implementadór projeitu bele implementa ho akuntábel no transparente.

Hahú iha tinan 2002 hafoin TL restaura ninian independénsia, PNUD ho konsistente suporta TL iha konsolidasaun instituisaun governu demoktrátika sistema no prosesu. Foku iha área akuntabilidade, governu lokál, suporta eleitorál no lei ho órden.

Iha tinan 2021-2025 PNUD nian hanaran The Country Programme  Document (CPD) mai PNUD Timor-Leste iha programatiku tolu mak hanesan, Lei ho Órden no asesu justisa, eleisaun no governu lokal ho fokus hasa’e kapasidade institusionál iha liñas ministeriais atu melora servisu di’ak liu tán inkluzivamente órgaun polisiál.

Komissáriu Sérgio Hornai agradese ba apoiu ne’ebé PNUD oferese iha tinan hirak nian laran mai iha instituisaun CAC.

Jornalista: Rogério Pereira Cárceres