Hatutan.com, (05 Abríl 2023), Díli—Konsellu Ministru (KM) hala’o sorumutuk iha Palásiu Governu, iha Dili aprova projetu Proposta Lei, ne’ebé aprezenta hosi Ministériu Ensinu Superiór, Siénsia no Kultura (MESSK), ba alterasaun dahuluk ba Lei númeru 14/2008, loron 29 fulan-outubru, hanaran Lei Baze Edukasaun.

Proposta Lei ne’e la’o ho konjuntu alterasaun ida ne’ebé nesesária hodi adekua lejizlasaun baze sira setór edukasionál nasaun nian ba ezijénsia no dezafiu atuál sira.

Lee Mós: Projetu Dekretu-Lei Kona-bá Estrutura Orgánika Autoridade Marítima Nasionál Aprovadu

“Propoin alterasaun ida ba norma refere ba lingua intrusaun no ensinu, ne’ebé define lingua portugeza hanesan lingua instrusaun no ensinu ba sistema edukativu tiomoroan, ho lingua tetun no lingua nasionál sira seluk asume papel fundamentál ida apoiu nian,” Hatutan.com sita komunikadu.

Halo mós alterasaun bá norma relativa oin-oin bá nível ensinu pré-eskolár, báziku no sekundáriu atu rekoñese importánsia aprendizajen lingua portugeza iha seitór edukativu nasionál.

Ho diploma ne’e, no ho objetivu atu elimina injustisa iha atribuisaun grau no diploma sira iha ensinu superiór tékniku, sei pasa karik posível bá estabelesimentu ensinu superiór tékniku atribui ona grau no diploma sira hanesan baxarelatu, lisensiatura ka mestradu.

Hakarak mós hodi permite atu atribui grau mestre hafoin konklui formasaun superiór ho durasaun semestre sanulu resin-rua, inklui parte lisensiatura, ne’ebé integradu no labele fahe, koresponde ho semestre da-ualu husi kursu mestradu integradu nian.

Ikus-liu, ho alterasaun ne’ebé propoin define mós katak ensinu iha distánsia (la prezensiál) tenke iha insidénsia iha nivel no ámbitu hotu-hotu hosi edukasaun nasionál Timor-Leste.

Jornalista: Rogério Pereira Cárceres