Hatutan.com (08 Abríl 2023), Díli– Páskua hanesan ambiente ida ne’ebé lori neineik nakukun bá naroman hodi hahú haree Jesus Nia moris hias lori naroman bá sarani sira ne’ebé moris iha susar ho terus  nia laran.

Lee Mós : Han Kalan Hamutuk, Jesus Fó Sentidu Foun Bá Tradisaun Judeu Sira Nian

Misa Sábadu Santa iha Igreja Katedrál Díli, 08 Abríl 2023. Foto/Elio dos Santos da Costa

Arsebispu Arkidioseze Metropolitana Díli, Mgr. Virgílio Kardeál do Carmo da Silva, SDB, iha nia omilia bainhira prezide selebrasaun misa Sábadu kalan, (8/4/2023), iha Igreja Katedrál Díli,  hateten naroman sériu ida-ne’e, fó naroman bá kreda tomak,  maske ema  ida-idak iha  nia nakukun, preokupa buat oi-oin no kalan ida-ne’e, momentu ida ne’e, mai  buka bá, mai loke netik leet oan ida, fó netik espasu ida bá naroman lilin ida-ne’e nian hodi bele tama iha ema nia moris.

“Naroman ne’e dalan ida-tan mai dere imi nia odamatan, dere imi nia fuan, atu imi labele taka imi nia fuan, maibé hamamar imi nia fuan bá, hodi naroman uitoan bele penetra  iha imi  nia nakukun,” Dom Virgílio Kardeál do Carmo da Silva, SDB hateten.

Dom Virgílio haktuir liturjia Sábadu Santa, kalan nian,  hahú iha odamatan boot igreja katedrál nian,  hahú iha nakukun laran hodi fó bensan bá ahi matan, hosi ahi matan foun ne’e, halakan uluk mak siriu paskál, lilin boot ne’ebé reprezenta Kristu moris hias, naroman lilin boot ninian, siriu paskál nia  naroman ida-né’e mak da’et hodi  hafurak  iha igreja laran. Tanba  bainhira Ahi mate hotu, hosi lilin ida-ne’e de’it mak fahe naroman bá ema hotu ne’ebé partisipa iha selebrasaun ida-ne’e.

Festa Páskua ida-ne’e, Dom Virgílio hateten, ema hotu hanoin bá kotuk  fila fali ba orijen hahú kedas iha livru Jéneze husi leitura hitu ne’ebé ohin  rona, hahú istória ema ho Maromak, tan ne’e mak ema  mós hahú hahí Maromak ho naroman boot lilin ninian hanesan estrela da manha, naroman ne’ebé sei la mate fila fali.

Nia fó sasin katak Maromak halo buat hotu furak maibé infelizmente tama sala tanba ema revolta hasoru Na’i Maromak,  ema mós hahú sente katak, hakarak sai hanesan Maromak, ema mós sente bele troka Maromak Nia fatin, sala la’ós lori umanidade bá oin, maibé sala halo umanidade fila fali bá kotuk, istória la la’o bá oin, maibé hakiduk bá kotuk tanba sala nia hahalok, ema buka atu hamate naroman ne’ebé iha tiha ona.

Dom Virgílio Kardeál do Carmo da Silva, SDB, sunu lilin iha misa Sábadu Santa iha Igreja Katedrál Díli, 08 Abríl 2023. Foto/Elio dos Santos da Costa

“Buat hotu Lao normal, buat hotu mamuk, Maromak haree, nakukun boot ida iha Maromak  ninia oin, entaun Nia hahú buka atu haketak buat ne’ebé nakukun hosi naroman, buat ne’ebé bokon hosi rai maran no Maromak hahú tau orden, no  buat ne’ebé seidauk iha orden, liu tiha Maromak haree tiha katak buat hirak ne’e furak tebes duni,” Dom Virgílio hateten iha nia omilia.

Iha tempu  páskua, tuir Dom Virgílio, Maromak iha ambisaun ida de’it hakarak atu konkista mate ho moris. Maromak lakohi ema hakmatek hela iha nakukun, Maromak lakohi ema hakmatek iha kaos, Maromak lakohi ema hakmatek iha dezorden laran, maibé Maromak hakarak ema hotu moris iha naroman.

Ho nune’e, Dom Virgílio hatutan, Izraél mak povu ida ne’ebé Maromak hili hosi povu hotu-hotu, la’ós tanba priviléjiu, maibé Izraél uma kreda ida  hanesan mós sarani doben sira, maibé mós tanba misaun ida atu halo Maromak Nia naroman nabilan iha povu hotu nia leet atu sira bele hatene no adora Maromak ne’ebé loos.

Tuir nia, Maromak buka duni umanidade atu bá hasoru moris, bá hasoru verdadeira libertasaun atu ema bele hatene Maromak ne’ebé loos, Maromak iha ambisaun ida de’it, ema halo páskua, buat normal bá maromak mak pasajen bá moris, normal bá maromak la’ós mate, maibé Jesus Nia moris hias, inversaun definitiva istória umanidade atu fila bá Maromak, Jesus nia moris hias mak Maromak nia ambisaun ba vitória moris ninian.

Iha páskua ne’e, ema hotu hakarak sai fila fali bá moris ida ne’ebé normal, hodi buka normaliza violénsia, ódiu, vingansa no nakukun, hatoman an ho kultura violénsia ninian tanba ne’e la’ós ema nia kultura, maibé ema nia kultura mak Maromak tanba ema hotu mai hosi Maromak nune’e buka atu hatoman an buat ne’ebé loos no di’ak.

Dom Virgílio tenik, festa Páskua ne’e mós konvida ema hotu atu hola konsiénsia kona-bá anti virus ida ne’e nostaljia bá Maromak mai prepara imi nia an, renova imi nia hakarak atu Jesus Nia moris hias bele halakan liután imi nia vontade, atu hakbesik no buka hodi hatoman an iha Maromak Ninia hakarak no vontade.

Lee Mós : Reflesaun Kinta-Feira Santa, “Halo Ida-Ne’e Hodi Hanoin Ha’u”

Jornalista :  Elio dos Santos da Costa