Hatutan.com, (31 Maiu 2023), Díli– Prezidente Komisaun B Parlamentu Nasionál (PN),  José Agostinho Sequeira “Somotxo” kestiona prosesu no desizaun  Ministériu Interior  hodi halo reforma bá membru Polísia Nasionál Timor-Leste (PNTL) na’in-158.

Jornal Republika. Foto/Repro

Lista reforma membru PNTL na’in-158 ne’ebé publika iha Jornál Republika. Foto/Repro

Lista reforma bá membru PNTL na’in-158  ne’ebé publika ofisial iha  Jornál Repúblika, edisaun Sesta-feira,  05 fulan-Maiu 2023, Serie II, númeru 18, iha sumáriu ne’e rasik, laiha no la temi kona-bá númeru despaixu ofisial hosi Ministériu Interior rasik, maske ministériu seluk iha hela ninia despaixu própriu.

“Lista ne’e, bele mós lista ida ne’ebé mai hosi instituisaun. Maibé, tuir legalidade, tenke iha despaixu. Agora laiha despaixu, ita mós hanesan konsidera bá buat barak. Tanba ita-nia polísia ne’e, ita mak uza, estadu Timor-Leste mak uza. Atu tama reforma ne’e mak lista de’it mós ita hanesan, laiha konsiderasaun.  Loloos ne’e, hanesan despaixu, depois maka akompaña lista ne’e,” Prezidente Komisaun B, Deputadu José Agostinho Sequeira “Somotxo” hateten bá bá jornalista sira iha PN, Tersa (30/05/2023).

Deputadu Somotxo dehan, dala-ruma lista naran kona-bá membru

PNTL sira nian ne’ebé submete hosi Komandu PNTL liuhosi Komandante Pesoál no Formasaun PNTL, Superintendente Xefe Polísia Arquimínio Ramos, lista ida ne’e hanesan esbosu ida de’it, atu enkamiña hela bá Ministériu Interior hodi haree no prepara kondisaun ruma, molok sira fila bá vida sívil. Maibé, lista naran hirak ne’e, ikus maiGgovernu deside hodi publika kedan ofisialmente iha Jornál Repúblika nian. Tanba ida ne’e maka, Deputadu Somotxo konsidera polítika bá reforma ida-ne’e la refleta bá lei.

“Depois rekursus umanus, señor Superintendente Xefe Arquemínio Ramos, aprezenta bá ministériu. Ha’u hanoin, ne’e hanesan esbosu ida ne’ebé aprezenta bá ministériu, ministériu kaer ida ne’e, publika iha jornál da repúblika, triste. Entaun, ha’u apela para sira revee fali, republika fali iha jornál da repúblika, ho hanesan tuir ninia regra sira, labele hanesan ne’e de’it,” deputadu Somotxo kestiona.

Prezidente Komsiaun B Parlamentu Nasionál dehan, instituisaun PNTL foin bá dala-uluk atu hahú implementa reforma bá ninia membru sira ne’ebé idade tama ona bá tinan 60 bá leten. Maibé, publikasaun lista naran reforma nian iha jornál repúblika ne’e sira mós la nota, no lista sira ne’e publika derrepente de’it.

Presiza Kondekorasaun

Prezidente Komisaun B Parlamentu Nasionál, José Agostinho Sequeira “Somotxo”. Foto/Elio dos Santos da Costa

Prezidente Komisaun B PN, José Agostinho Sequeira “Somotxo” dehan,  maske membru sira ne’e ninia idade tama ona iha reforma, maibé, molok sira sai, governu tenke organiza seremónia ruma ho di’ak, liu-liu hanoin oinsá mak atu bele atribui kondekorasaun ruma bá sira, nu’udár aktu agredesimentu bá sira-ninia dedikasaun durante ne’e.

“Lista própriu ne’ebé mosu derrepente de’it iha ne’ebá ne’e mak, sein despaixu, sein hanesan, na’in laiha. Na’in loloos mak rekursus umanus hato’o bá ne’e, nein asinatura. Purtantu, ida-ne’e mak hanesan, ami mós sente no hanesan falta de konsiderasaun bá ita-nia  membru PNTL lubun ne’ebé  atu reforma,” Somotxo haktuir.

Somotxo  triste oitoan, tanba PNTL sira ne’ebé sai ne’e la’ós foin, sira mós ninia kontribuisaun ne’e boot bá nasaun ne’e, bá seguransa, bá estábilidade. Tanba ne’e, nia husu ministériu interior atu organiza seremónia ida molok sira reforma.

La to’o de’it iha ne’e, Somotxo mós husu Governu atu halo promosaun bá membru sira ne’e ninia deviza. Sira ne’ebé ho deviza Ajente, promove bá Ajente Xefe hosi Sarjentu bá Sarjentu Xefe, Inspetór Asistente bá Inspetór Xefe, Superintendente bá Superintendente Xefe no promóve bá fitun ida to’o fitun rua.

Oitavu Governu Laiha Ona Kompeténsia

Tuir planu, iha inísiu fulan-Juñu, tinan ne’e, Governu sei halo anunsia ofisial ida hodi husik membru PNTL sira ne’e fila bá vida sívil. Hatán bá ida ne’e, deputadu Somotxo dehan, Oitavu Governu laiha ona kompeténsia atu halo desizaun bá reforma ida ne’e tanba dadaun ne’e tama ona bá iha Governu jestaun.

“Ha’u hatene katak, governu ida ne’e  tama ona iha governu jestaun. Ne’e sei iha problema ho problema ida ne’ebé ohin ita ko’alia, juridikamente, pur-regra ne’e, derrepente lista ne’e mosu. Sé hanesan autoridade sira rona ha’u, agora, liste reforma ne’e, labele halo ida ne’ebé hanesan ema sente triste. Sermónia ida ne’ebé dignu bá sira, hanesan fó hatene bá sira, agradese sira mak sira fila bá reforma,”Deputadu Somotxo hateten.

Nia husu bá Governu atuál atu husik ona asuntu ne’e bá governu foun mai mak bele rezolve, oitavu governu konstitusionál ne’ebé lidera hosi Primeiru Ministru (PM), Taur Matan Ruak, laiha ona kompeténsia.

Jornalista: Rogério Pereira Cárceres