Hatutan.com, (02 Agostu 2023), Díli-Embaixadór Koreia du Súl mai Timor-Leste, Shin Mantaek, Kuarta (02/08/2023), distribui  lívru hamutuk 2000 ho lian Koreia  bá Sekretária Estadu Formasaun Profisionál no Empregu (SEFOPE).

Lee Mós : TL ho Korea Súl Sei Metin Liu-tán Iha Kooperasaun Ekonómika

Lívru hirak ne’e simu direta hosi Sekretáriu Estadu Formasaun Profisionál  no Empregu (SEFOPE), Rogério Araújo Mendonça, iha Centro Formação Professional (CFP) SENAI, Becora.

Embaixadór Koreia du Súl mai Timor-Leste, Shin Mantaek, Kuarta (02/08/2023), distribui lívru hamutuk 2000 ho lian Koreia bá Sekretária Estadu Formasaun Profisionál no Empregu (SEFOPE). Foto/Mídia SEFOPE

Sekretariu Estadu Rogério Mendonça hateten, inisiativa hosi Embaixadór Koreia dú Súl mai Timor-Leste, Shin Mantek hodi halo distribuisaun lívru bá sentru formasaun 26 iha Timor-Leste, nune’e, fasilita  formasaun bá língua Koreia nian bá iha juventude sira.

“Konteúdu lívru ne’e, liu-liu kona-bá lingua Koreia nian atu bele asesu bá iha formasaun, hodi bele asesu bá merkadu traballu iha rai-li’ur. Ne’e katak, iha lian Tétum ho Koreia. Kuantidade hamutuk rihun rua hodi fahe bá sentru formasaun 26,” Rogério Araújo Mendonça hateten.

SEFOPE kontinua halo identifikasaun bá kada sentru formasaun sira, haree liu-liu bá sira ninian kapasidade formasaun nian, nune’e Governu bele prevee liután orsamentu hodi tulun sira, hakbiit sentru formasaun sira ne’e bá oin hodi hasa’e kapasidade foin-sa’e nian.

Hatán kona-bá oinsá kualifikasaun ka kualidade hosi sentru formasaun 26 ne’e ninian, SEFOPE Rogério dehan, hosi sentru hirak ne’e, iha ualu (8) maka hetan ona kualifikasaun, tuir ona padraun Nacional para o Dezenvolvimento Mão de Obra (INDMO) nian, hosi nível to’o IV. Maibé seluk ne’e sei iha prosesu avaliasaun laran.

Iha fatin hanesan, Embaixadór Korea Súl mai Timor-Leste, Shin Mantaek esplika, objetivu boot liu, hodi distribui lívru hirak ne’e,  tanba Governu, Estadu Korea, daudaun ne’e, presiza traballadór estranjeiru barak.

“Ami mai distribui lívru ida ne’e, objetivu para ema ida tán mak aumenta bá mós, ne’e natoon ona. Ita hakarak atu aumenta númeru traballadór bá iha Koreia ne’ebá,” Embaixadór Shin Mantaek hateten.

Governu Koreia du Súl liuhosi Embaixadór Shin Man taek, kompromete servisu hamutuk nafatin ho SEFOPE, halo esforsu hamutuk, atu oinsá bele hasae’ númeru traballadór sira barak liu hodi bá aprende no servisu iha Koreia.

Jornalista: Rogério Pereira Cárceres