Hatutan.com, (03 Agostu 2023), Díli–International Finance Coorporation (IFC) sujere bá Governu Timor-Leste lidera hosi Primeiru-Ministru (PM), Xanana Gusmão, atu kontínua konsentra bá dezenvolvimentu infraestrutura bázika iha rai-laran hodi fó asesbilidade bá povu sira.
Lee Mós : Governu Sei Tau Orsamentu Bazeia bá Programa
International Finance Coorporation (IFC) mós rekomenda atu Governu ne’e reforsa setor privadu sira atu bele partisipa ativu iha prosesu dezenvolvimentu nasionál.
Delegasaun IFC hasoru malu ho Vise Primeiru-Ministru no Ministru Koordenadór bá asuntu Ekonómiku, Turizmu no Ambiente, Francisco Kalbuadi Lay, Kinta (03/08/2023). Foto/Elio dos Santos da Costa
Liuhosi sorumutuk ho Vise Primeiru-Ministru no Ministru Koordenadór bá asuntu Ekonómiku, Turizmu no Ambiente, Francisco Kalbuadi Lay iha Díli, Kinta (03/08/2023), IFC Regional Manager, Paramita Dagupta, aprezenta IFC nia prontidaun atu halo saida de’it nune’e lori progresu dezenvolvimentu ekonomia mai Timor-Leste.
Vise Primeiru-Ministru, Ministru Koordenador ba assuntu Ekonómiku, Ministru Turizmu no Ambiente, Francisco Kalbuadi Lay, hateten nia haksolok tebes no agradese bá IFC nia programa Public-Private Partnership (PPP) ne’ebé hala’o ona iha Timor-Leste hanesan iha Aeroportu, Portu Tibar, no projetu sira seluk ne’ebé IFC halo ona ho TradeInvest, SERVE, no setor sira seluk.
Liuhosi sorumutuk ne’e delegasaun IFC ne’ebé lidera hosi IFC Regional Manager, Paramita Dagupta, IFC Resident Representative, David freedman, Senior Operation Officer, Lan Van Nguyen no Dario Quarantana, inklui Leila Martins ho Rita Pires nu’udar Operation Officer aprezenta mós kona-bá saida mak sira halo ona durante ne’e iha Timor-Leste, no hakarak mós atualiza kona-bá saida mak sira bele halo tan iha rai-laran liu-liu iha governasaun atuál.
IFC mós sei fó prioridade bá setor tolu ne’ebé importante hanesan reforsa setor privadu, prioritiza bá programa dezenvolvimentu inklui dezenvolvimentu infraestrutura báziku.
IFC nu’udár instituisaun finanseira internasional ne’ebé oferese servisu investimentu, konsultoria no jestaun ativu hodi insentiva dezenvolvimentu setor privadu iha nasaun menus dezenvolvimentu sira, inklui Timor-Leste.
IFC mós nu’udar membru Grupu Banku Mundial (World Bank Group) ho nia kuartel jeral iha Washington, D.C., iha Estadus Unidus Amerika.
IFC hahú tama Timor-Leste iha tinan 2004 ne’ebé hare liu-ba dezenvolvimentu setor privadu sira iha rai-laran.
Jornalista Estajiáriu : Lazaro Pereira Quefi