Hatutan.com (02 Outubru 2023), Díli—Vise Primeiru-Ministru asuntu Ekonomia no Ministru Turizmu no Ambiente, Francisco Kalbuadi Lay, akompaña hosi Ministru Komérsiu no Indústria (MCI), Filipus Nino Pereira, hamutuk ho dirijente sira Sentru Nasional Lojístika (CLN),   Segunda (02/10/2023), lansa ofisiálmente intervensaun Governu nian iha merkadu nasionál hodi fa’an foos ho folin $12.00 ba kada saku 25kg.

Lee Mós: Normaliza Presu Foos, Governu Aprova Subsídiu bá Empreza Importadór Foos

Foos iha armajenamentu CLN nian iha Tibar, Liquiça, atu fa’an ho presu $12.00 kada saka 25kg bá povu iha terítoriu nasionál. Foto/Elio dos Santos da Costa

Lansamentu ne’ebé hala’o iha Armajenamentu CLN nian iha Tibar, Munisípiu Liquiça, atu responde bá preokupasaun povu nian kona-bá folin foos ne’ebé loron bá loron sa’e maka’as iha merkadu nasionál.

Daudaun ne’e foos ho kuantidade 25kg fa’an iha merkadu nasionál ho presu $25.00 no iha Munisípiu balun, liuliu área remota sira fa’an ona ho folin entre $26-$28 kada saku.   

“Governu  lansa ona intervensaun fa’an foos iha merkadu territóriu nasionál hotu ho presu razoavel $12 kada saku 25kg  bazeia  Dekretu-Lei ne’ebe fó sai hosi Konsellu Ministru no promulga ona hosi Prezidente Repúblika,” Ministru Filipus Nino Pereira hateten iha Tibar no subliña tan katak Governu halo intervensaun ida-ne’e hodi bele ajuda povu kbiit laek sira bele sosa foos.

Foos ne’ebé Governu fa’an ne’e la’ós foos importasaun maibé foos lokál  ne’ebé Governu sosa hosi agrikultór sira atu bele insentiva mós agrikultór sira halo produsaun foos barak liu tan.

Estoke foos lokal ne’ebe Governu prepara ona iha armajenamentu CLN hamutuk tonelada 2300 no tuir planu sei hahú uluk iha Munisípiu Díli hodi kontinua  alarga bá munisípiu seluk  tan no fa’an diretamente hosi CLN.

Vise-Primeiru Ministru, Francisco Kalbuadi Lay afirma katak intervensaun Governu nian ne’e hanesan  meius ida hodi bele ajuda povu sira sosa foos bá nesesidade. Nune’e, Governu garante katak kuantidade foos ho tonelada 2300 sei labele interven áa merkadu iha Timor laran hotu, maibé  Governu hatudu nia vontade no interese boot bá povu.

Vise-PM Francisco Kalbuadi Lay ofisializa intervensaun Governu nian bá normaliza presu foos iha merkadu nasionál. Foto/Elio dos Santos da Costa

Francisco Kalbuadi Lay hateten, foos folin sa’e ne’e la’ós iha Timor de’it, maibe akontese iha nivel rejionál no mundiál. Tanba nasaun produtór foos  sira hamenus ona sira-nia importasaun foos bá rai seluk ka nasaun seluk tanba sira mós prepara estoke bá sira-nia rai-laran iha situasaun bai-loron naruk no liuliu asegura sira-nia soberanu ai-han iha krize mundiál ikus-ikus ne’e.

Vise-PM Francisco Kalbuadi Lay husu ba setór importador sira atu bele kolabora ho Governu hodi normaliza folin foos iha merkadu

Afirmasaun Vise-Ministru Asuntu Parlamentár

Hosi sorin seluk, Vise-Ministru Asuntu Parlamentár,  Adérito Hugo da Costa, hateten polítika Governu nian ne’ebé halo mak hatún folin  no fa’an foos direta bá povu ho presu $12 kada saka 25kg  iha teritóriu Timor-Leste

Governu lansa intervensaun merkadu hodi fa’an foos ho folin $12.00 kada saka 25kg. Foto/Elio dos Santos da Costa

“CLN mak sei transporta bá munisípiu sira ho kustu hosi CLN rasik mak $12.00 kada saka 25kg,” Adérito Hugo hateten.

Nia esplika katak foos hosi CLN  ho folin $12.00 sei la haree bá distánsia munisípiu, inklui Rejiaun Administrativu Espesiál Oé-Cusse Ambeno (RAEOA), katak iha territóriu nasionál sei fa’an hotu ho de’it $12.00 kada saka 25kg.  

“Ita espera katak hosi polítika ida-ne’e distintus deputadus sira inklui komisaun espesializadu sira bele akompaña implementasaun iha terenu,” Adérito Hugo  hateten hodi husu mós fiskalizasaun hosi Parlamentu Nasionál (PN).

Jornalista: Leopoldina de Carvalho/Zita Menezes