Hatutan.com, (19 Agostu 2023), Díli-Komandu Polísia Nasionál Timor-Leste (PNTL) sei koloka tan nia membru atu haforsa seguransa iha liña fronteira Timor-Leste (TL) ho Repúblika Indonézia (RI).

Lee Mós : Kuidadu, Membru PNTL Jura bá Partidu Polítiku

Komandante Jerál PNTL, Komisáriu Henrique da Costa, rekoñese frakeza sira kona-bá ‘oinsá mak halo jestaun bá membru sira’ tanba dala-ruma iha Corpo Segurança Pessoal ninian, ema barak liu, maibé sira la uza ho efikáz.

Mina ilegál tonelada rua ne’ebé Membru UPF hosi kompañia Bravo-Suai, Preende iha área Damuk, Aiteka-Laran, Aldeia Wetaba, Suku Beiseuk, Postu-Administrativu Tilomar, Munisípiu Covalima, Kinta 04 Agostu 2022). Foto/Dok. PNTL.

“Orientasaun Primeiru-Ministru  (PM) Xanana Gusmão nian bá PNTL atu haforsa fronteira. Bá oin, ita sei haree, nune’e, bele iha fila-fali, ita sei apoiu tán bá iha fronteira,” Komisáriu Henrique da Costa hateten iha diskursu seremónia aniversáriu estabelesimentu Unidade Especial da Policia (UEP), Kuartel Jerál UEP iha Bairo Pite, Díli, Sesta (18/08/2023).

Komisáriu Henrique dehan, kolokasaun membru PNTL iha liña fronteira TL-RI sei envolve mós membru sira hosi Komandu PNTL Munisípiu hothotu bá apoia tán Unidade Polísia Fronteira (UPF).

“Ida ne’e, la’os aplika de’it bá iha Unidade Espesial, ka bá iha Corpo Segurança Pessoal nian de’it, maibé bá ita sira seluk mós, ita sei husu mós apoiu hosi munisípiu sira, atu nune’e, bele apoiu mós bá iha fronteira,” Komisáriu Henrique tenik.

Bá tinan ida ne’e, Komandu laiha planu atu halo rekrutamentu, karik, possível, tinan oin. Mais, iha faze ida rekrutamentu nian, sira seidauk bele koloka ema bá iha lutu fronteira.

“Rekursu ne’ebé ita iha, mak ita sei utiliza, nune’e, bele apoiu bá iha fronteira,” tenik Komisáriu Henrique.

PNTL Tenke Servisu Independente

Ministru Interior (MI), Francisco Guterres, haktuir mensájen Primeiru-Ministru (PM), Kay Rala Xanana Gusmão nian husu bá membru PNTL sira tomak, atu halo servisu loroloron ho independente, labele depende fali bá ema ida ka grupu ida, maibé, kumpri de’it ordém hosi komandu.

“PM Xanana ezíje bá ita sira ne’e hotu, liu-liu PNTL atu hala’o imi-nia servisu ho profesionál, ho independénsia, katak, labele depende ema ida, labele depende bá grupu ida, maibé, depende bá iha estrutura komandu, defende legalidade no estadu direitu demokrátiku ida ne’e,” Ministru Francisco Guterres  hateten iha diskursu.

Ministru Francisco konsidera, vizita PM Xanana nian iha Akadémia PNTL iha Comoro, marka istória ida, hodi lori fila-fali konfiansa povu nian, bá membru polísia tomak.

Jornalista: Rogério Pereira Cárceres