Hatutan.com, (18 Setembru 2023), Díli—Komandu Polísia Nasionál Timor-Leste (PNTL) liu hosi Departamentu Investigasaun Kriminál (DIK) hala’o ona prossesu investigasaun ba Kazu Insidente ida ne’ebé akontese iha loron 16 fulan Setembru 2023, ne’ebé membru PNTL ida tiru kanek joven na’in-ida ho naran Julívio Perreira Bruno Pinto iha área Bidau Akadiruhun.

Porta Vóz Komandu PNTL, Superintendente Polísia António da Luz esplika kronolojia akontesimentu memru BOP tiru joven ida iha Bidau Akadiruhun, liu hosi konferénsia imprensa iha Komandu PNTL Caicoli, Segunda (18/09). Foto: PNTL.

Porta Vóz Komandu PNTL, Superintendente Polísia António da Luz esplika kronolojia akontesimentu ne’e katak, tuir loloos iha tuku 10 kalan ema hotu presiza deskansa maibé iha joven balun mak halo barullu hodi perturba ema seluk nia direitu to’o tuku 3 madrugada.

“Entaun ita nia membru ida ho inisiál DJ sente katak joven sira ne’e halo barullu no sai mai fó hanoin didi’ak atu labele halo barullu tanba ema presiza deskansa. Maibé, iha joven ida hamrik hodi insulta kedan membru PNTL ne’e no atu baku tán,” Hatutan.com sita deklarasaun Porta Voz Komandu PNTL iha komunikadu, Segunda (18/09).

Ho ida-ne’e maka membru ne’e sente katak joven ida-ne’e ho forsa atu baku tanba ne’e membru PNTL ne’e foti kilat hodi tiru fó atensaun dala ida, maibé joven ne’e kontinua nafatin halo provokasaun, nune’e loos duni, nia foti pistola hodi tiru kedan joven ne’e ninia ain.

“Iha momentu ne’ebá, ita nia membru sira husi DIK tu’un kedan ba iha fatin akontesimentu hodi assegura kedan membru ne’e iha sela no prosesu kontinuasaun la’o hela ho númeru NUC: 0256/2023/PNSIK  prosesu ne’e hein oras 72 hafoin maka enkamiňa ba iha Ministeriu Públiku (MP) atu kumpre prosesu kontinuasaun,” Superintendente Polísia ne’e hatutan.

Nia argumente katak, iha atuasaun sira ne’e, bele haree katak, akontesimentu ne’e bele prejudika membru ida ninia aan, entaun nia defende nia aan, nune’e nia uza duni arma ne’e hodi tiru joven ne’e.

Kazu ne’e agora daudaun sei iha prosesu investigasaun nia laran, tanba ne’e iha prosesu mak bele hatene motivu loloos hosi aktu tiru kanek joven ne’e.

Lei No.5/2017 iha artigu balun maka fó dalan bá Polísia ida bainhira iha situasaun perigu nia laran, nia bele utiliza meius uza arma hodi defende nia aan hosi perigu ne’e.

Oras ne’e daudaun ekipa hosi DIK sei hein hela kondisaun vítima nian hodi fó ninia deklarasaun ba akontesimentu ne’e no PNTL labele divulga informasaun ne’ebé maka sees hosi prosseu investigasaun.

Tuir informasaun ne’ebé maka iha katak, membru PNTL ho vítima hanesan viziñu maibé sira iha relasaun familia, nune’e prossesu investigasaun mak foin bele hatene.

Jornalista: Rogério Pereira Cárceres