Hatutan.com, (20 Setembru 2023), Díli– Organizasaun La’ós Governu nian (ONG) ne’ebé durante ne’e halo servisu monitorizasaun no advokasia iha setór justisa, Programa Monitorizasaun Sistema Justisa (JSMP, sigla portugés) propoin bá IX Governu atu foku iha hadi’a jestaun rekursu umanu iha setór justisa atu bele alkansa polítika reforma justisa.

Lee Mós: Xanana Nomeia Lúcia Lobato Lídera Grupu Traballu bá Reforma Seitór Justisa

Diretora Ezekutiva JSMP, Ana Paula Marçal. Foto/Lazaro Pereira Quefi

Diretora Ezekutivu JSMP, Ana Paula Marçal bá Hatutan.com iha nia servisu fatin, Díli, Kuarta (20/09/2023), hateten parte JSMP konkorda ho polítika IX Governu nian atu halo reforma iha setór justisa atu hadi’a liután prestasaun servisu justisa nian bá interese povu no Estadu Timor-Leste.

Bá polítika reforma justisa ne’e, Ministériu Justisa komunika ona ho JSMP atu oinsá mak konsolida informasaun relevante sira iha setór justisa nian, armonia lei no seluk-seluk tan.

“Iha Grupu Traballu Reforma Justisa ne’ebé lidera hosi antiga Ministra Justisa Lucia Lobato ,bolu JSMP bá atu troka hanoin kona-bá iha reforma justisa ne’e rasik. JSMP agradese tamba ita-nia Governu iha hanoin di’ak ida atu hadi’a no hatuur fila-fali setór sira ne’e atu halo servisu sai profisionál hodi bele hetan konfiansa hosi ita-nia povu,” Ana Paula Marçal hateten.

Tuir JSMP nia opiniaun rasik katak reforma justisa ne’e tenke fó justisa ba ema hotu ho transparénsia, efetivu, efisiénsia katak ida ne’e mak tratamentu ida ne’ebé justu ba ema hotu.

“Ami nia hanoin bá Governu ne’e mak buat ne’ebé atu hadia no hakarak ita nia setór justisa sai kualidade liután. Ami iha hanoin han-malu ho saida mak planu no programa justisa nian bá tinan-5. Tamba heree fila-fali iha sistema rekrutamentu sentru formasaun jurídiku no judisiáriu atu prodús ita-nia autór Tribunál sira ne’e ami husu se bele imediata. Labele to’o tinan-2  ka tinan- 3 mak foin implementa maibé tenke inisia sedu” Diretora Ezekutiva JSMP ne’e tenik.

JSMP totalmente apoiu reforma iha setór justisa ho intensaun atu hadi’a, konsolida no haforte servisu justisa nian ida di’ak liu ba interese komún.

Tuir JSMP nia avaliasaun katak sektór justisa nia servisu atu kumpre loron 120 durante ne’e la’o di’ak maibé husu atu presiza halo di’ak liu tan liuliu ba rekursu umanus tantu kualidade ho kuantidade, fasilidade no orsamentu.

“Iha oportunidade ne’e ha’u rekomenda de’it bá iha ita nia órgaun jurídiku sira atu halakon tiha ema nia hanoin liu hosi servisu ka iha duni aktu profisionál atu trata ema hotu hanesan, la iha diskriminasaun maibé ho transparénsia ho desizaun ida ne’ebé justu” Ana Paula Marçal hateten.

JSMP  husu nafatin ba iha autór tribunál sira tenke kumpre nafatin sira-nia papél no lei prosedimentu sira bainhira halo prosesu kazu ruma bá ema hotu hanesan, atu nune’e, fó asisténsia ida legal no justu iha públiku.

Jornalista Estajiáriu : Lazaro Pereira Quefi