Hatutan.com, (30 Setembru 2023), Díli-Estadu no Governu Reinu Unidu  hakarak mós simu Timoroan sira ne’ebé iha interese atu bá estuda iha universidade sira iha Reinu Unidu. Ho nune’e, Timoroan sira bele aplika de’it liuhosi programa bolsa estudu ho naran “British Chevening Scholarship”, tanba programa bolsa ne’e fó duni oportunidade bá estudante internasionál sira.

Lee Mós: Reinu Unidu Kompromete Apoiu TL Nia Dezenvolvimentu Ekonomia, Saúde no Nutrisaun

Ministra Estadu Reinu Unidu nian bá Indo-Pasífiku, Anne Marie-Trevelyan. Foto/Elio dos Santos da Costa

“Kontente tebes, saida mak ami bele halo, liu-liu iha programa bolsa estudu ne’ebé mak bolu naran Chevening ne’e, horiseik, ami kontente hasoru katak, iha alumni ida mós hosi Chevening, bolsa estudu hosi governu UK nian, ita-boot sira nian Ministru Negósiu Estranjeiru no Kooperasaun, Bendito Freitas bele kontinua nafatin, atu bele haree bolsa estudu sira ne’e, iha mós aplikasaun online ne’ebé ita-boot sira bele tuir, liu-liu iha www.chevening.ogr ida ne’ebé maka ita-boot sira bele aplika rasik iha ne’ebá,” Ministra Estadu Reinu Unidu nian bá Indo-Pasífiku, Anne Marie-Trevelyan, hateten  hafoin diálogu ho feto diplomata timoroan sira iha Salaun MNEK, Díli, Sábadu (30/09/2023).

Programa Bolsa estudu British Chevening Scholarship, ne’e mak Reinu Unidu nia bolsa estudu ne’ebé oferese bá estudante internasionál sira ne’ebé finansia hosi Reinu Unidu, Estranjeiru no Komunidade no organizasaun parseiru sira. Bolsa estudu ne’e fornese fundu kompletu ka parsiál bá programa graduadu tempu-tomak iha kualkér matéria.

“Kontente tebes, ida ne’e hanesan onra boot ida, bele vizita Timor-Leste, nasaun ida ne’ebé mak furak tebes, ida-ne’e, vizita bá dahuluk nian. Ita-boot sira hatene katak, ha’u hasoru ita-boot sira-nia lider senior sira balu, no mós iha tempu balu, atu hasoru mós parte sira saúde nian,” Ministra Anne Marie-Trevelyan, hateten.

Ministra Estadu Reinu Unidu nian bá país Indo-Pasífiku ne’e interesante tebes tanba durante vizita estadu iha Timor-Leste hasoru ona mós ho membru parlamentu sira, liu-liu servisu sira ne’ebé mak sira halo ona, intermu igualdade jéneru nian, no Reinu Unidu mós kontinua atu bele servisu hamutuk ho Governu Timor-Leste, liu-liu liuhosi programa sira bá ajenda feto pás no seguransa.

“Servisu hamutuk ona ho UN Women, liu-liu atu hakbiit liután nia papél iha lideransa, nune’e mós oinsá atu bele apoiu Governu bá iha ninian adezaun sira bá ASEAN, nune’e mós kontinua atu haree tán fila-fali posibilidade no oportunidade sira, atu bele servisu hamutuk di’ak liután ho Governu Timor-Leste,” Ministra Anne Marie-Trevelyan, hateten.

Jornalista: Rogério Pereira Cárceres