Hatutan.com, (13 Novembru 2023), Díli—Primeiri-Ministru (PM), Kay Rala Xanana Gusmão husu ba xefe Suku Balibar atu kria programa ne’ebé furak atu hadia dezenvolvimentu no lori povu bele moris hakmatek.

Lee Mós: Prezidente Repúblika Sei Organiza Enkontru ho Xefe Suku Eleitu sira

PM Xanana hato’o mensajen bá jornalista sira iha ámbitu eleisaun órgaun suku segunda volta iha sentru votasaun Suku Lacoto, Balibar, Díli, Segunda (13/11/2023). Foto/Média GPM

Primeiru-Ministru Xanana Gusmão, informa asuntu-ne’e hafoin ezerse ninia direitu síviku  hodi vota iha eleisaun órgaun suku segunda volta iha sentru votasaun Eskola TK, Aldeia Lacoto, Suku Balibar, Postu Administrativu Cristo Rei, Munisípiu Díli, Segunda (13/11/2023).

Suku Balibar kompostu hosi aldeia haat, hanesan Fatu Loda, Lacoto, Lorico no Tancae iha votante 700-resin maka tuir votasaun iha eleisaun ógaun Suku 2023.

Antes ne’e iha eleisaun primeira ronda ne’ebé hala’o iha loron 28 fulan-Outubru 2023 liuba, kandidatura Xefe Suku hamutuk ema na’in-neen (6) mak kompente. Iha eleisaun segundu ronda konsege hili kanditura na’in-rua de’it maka kompente hanesan, Gil Yanes da Silva Sores no João Mesquita Soares.

Ho eleisaun suku ne’e, PM Xanana espera povu Balibar bele vota bá xefe suku na’i- rua ne’e se maka eleitu  tenke kria programa barak iha suku laran.

“Ha’u mai iha ne’e hanesan sidadaun hodi ezerse ha’u nia direitu hodi vota no ida ne’e hanesan dever ida mak ha’u mai vota. Ha’u husu boot se de’it mak povu Balibar hili bele kumpri nia obrigasaun. Tanba ami hili ona xefe aldeia no delegadu sira, no depois sira sei pose, ami sei halibur malu hodi fó hanoin bá malu atu nune’e servisu ho di’ak bá Balibar bele moris ho hakmatek kontribui ba ita-nia dezenvolvimentu,” PM Xanana hateten hanesan sita iha komunikadu imprensa ne’ebé Hatutan.com asesu.

Lider karizmátiku ne’e  alerta bá kandidatu xefe suku na’in-rua ne’ebé kompete ona eleisaun segundu volta atu bele kumpri dever no obrigasaun.

Iha fatin hanesan, Kandidatu Xefe Suku Balibar, Gil Yanes da Silva Sores no João Mesquita Soares informa bainhira sira na’in rua ne’e ida manan sei tane aas konfiansa povu hodi servisu ho entidade hotu- hotu halo programa di’ak ba povu Balibar.

Elisaun iha Suku Balibar hetan seguransa masimu hosi Komandu PNTL no hetan obserbasaun direita hosi ekipa obserbador CNE no ekipa g7+.

Hafoin vota, PM Xanana hala’o kedas enkontru ho Xefe Aldeia Lacoto, Crispin Soares Martins hamutuk ho komunidade sira hodi kria programa hanesan formasaun kursu Ingles bá joventude sira, realiza atividade desportu futebol no  voly bá eventu “Taxa Xanana” iha Suku Balibar hodi hametin unidade juventude sira nian.

Hafoin hala’o enkontru, PM Xanana kontinua sosa hahán no dosi hodi fahe bá labarik no ferik-katuas sira ne’ebé partisipa iha eleisaun órgaun suku segunda ronde iha sentru votasaun refere.

Jornalista: Rogério Pereira Cárceres